Kóliktiń elge qaı kúni kirgizilgenin anyqtaý jumysy da avtomattandyrylǵan.
Qazaqstanda shetelden ákelingen avtokólikterdi zańdastyrý naýqany áli de belgisiz. İİM ókilderi tıisti qaýly búginde Úkimettiń qaraýynda ekenin málim etti, dep habarlaıdy Almaty-akshamy.kz Almaty.tv-ge silteme jasap.
Aıta ketsek, buǵan deıin Prezıdent Qasym-Jomart Toqaev sheteldik kólikterdi zańdastyrý máselesine baılanysty Úkimet jumysyn synǵa alyp, kópshiliktiń áli kúnge deıin aqparatpen tolyq qamtamasyz etilmegenin aıtty.
İİM dereginshe, qazir el aýmaǵynda zańdastyrýǵa jatatyn avtokólikter sany 300 myńnan asady. Deni - Reseıden ákelingen. Buǵan deıin resmı derekkózderde Parlamenttiń Salyq kodeksine engizilgen alǵashqy túzetýlerdi qabyldaǵany habarlandy. Zańdastyrýǵa jatatyn kólikterdi bastapqy tirkeý úshin tólenetin alym 200 myń teńge kóleminde dep belgilendi.
«Qoljetimdi bolsa, tıimdi. Shetelden kirgen zańdy bolsa, árıne. Ana jaqta tirkeýde joq, myna jaqta da joq bolyp qalsa, Úkimet júrgizbeı qoıady. Jolǵa shyǵarmaıdy», – dedi qala turǵyny Arystanbek Eleýsiz.
«Tólem quny 200-250 myń teńge bolsa, biz úshin úlken kómek», – dedi qala turǵyny Rınat Qojabergenov
Aıta ketsek, izdeýde júrgen nemese tolyq kedendik tazartýdan ótpegen, sondaı-aq 2022 jyldyń 1 qyrkúıeginen keıin ákelingen avtokólikter zańdastyrýǵa jatpaıdy. Alaıda qańtardyń alǵashqy kúnderine josparlanǵan naýqannyń bastalar shaǵy áli de belgisiz.
«Sheteldik kólikterdi zańdastyrý boıynsha qaýly búgingi tańda Úkimettiń qaraýynda. Úkimet tarapynan qol qoıylǵannan keıin, zańdy kúshine engen soń, birinshi kúnnen bastap tirkeý jumystary júrgizile bastaıdy», – dedi QR İİM Ákimshilik polısıa komıtetiniń erekshe tapsyrmalar jónindegi aǵa ınspektory Altynbek Jamalıev.
Quzyrly organ ókiliniń sózinshe, sheteldik kóliktiń elge qaı kúni kirgizilgenin anyqtaý jumysy da avtomattandyrylǵan. Temir tulpardyń shekaradan ótken ýaqyty UQK Shekara qyzmetiniń derekter bazasy boıynsha nemese avtosaqtandyrý polısiniń alǵashqy rásimdelgen kúni boıynsha anyqtalady.
Shetelden kirgen kóligin zańdastyrý úshin ıesi qandaı tekserýden ótetini Mamandandyrylǵan halyqqa qyzmet kórsetý ortalyǵynyń qyzmetkerlerine de ázirge beımálim.