Shetelden 7 aılyq bala tabylyp, Qazaqstanǵa qaıtaryldy.
Bul týraly Oqý-aǵartý mınıstrliginiń Balalardyń quqyqtaryn qorǵaý komıteti málimdeme jasady, dep habarlaıdy aqshamnews.kz.
Komıtet 7 aılyq Qazaqstan azamatynyń Reseı Federasıasynan elge oralǵanyn habarlaıdy. Kelgen boıda búldirshin balalar aýrýhanasyna qaralyp, tekserilý úshin jatqyzyldy. Qazirgi ýaqytta onyń jaǵdaıy turaqty. Medısınalyq sharalar aıaqtalǵan soń náreste "Balalar úıi" KMM-ne jiberiledi. Balany alyp kelý prosesine ádisker-qamqorshy jáne anestezıolog-reanımatolog qatysty.
"Biz úshin árbir balanyń qandaı jaǵdaı bolmasyn, qajetti qoldaý alýy mańyzdy. Sondaı-aq elimizdiń árbir azamatyna barynsha qamqorlyq kórsetip, qaýipsizdigin qamtamasyz etýge tyrysyp jatyrmyz. Tıisti organdar men mamandar kishkentaı náresteni elge qaıtarý úshin jumys atqardy. Osy jaqta onyń ósip-jetilýi úshin bilikti mamandar qoldan kelgenniń bárin jasaıdy", – dep atap ótti QR Oqý-aǵartý mınıstrligi Balalardyń quqyqtaryn qorǵaý komıtetiniń tóraıymy Nasymjan Ospanova.
Vedomstvo málimetinshe, komıtet balalardyń qaýipsizdigi men ál-aýqatyn qamtamasyz ete otyryp, olardyń quqyqtary men múddelerin qorǵaý jónindegi belsendi jumysty jalǵastyryp jatyr.
"Biz qajet bolǵan jaǵdaıda balalardy Otanyna qaıtarý úshin bar kúsh-jigerimizdi salamyz jáne olardyń kásibı mamandardyń qamqorlyǵynda bolýyn qamtamasyz etemiz", – delingen habarlamada.