Segiz memleketten kelgen 200-ge jýyq bala kýrorttyq aımaqta demalyp jatyr.
Úshinshi jyl uıymdastyrylǵan jazǵy lagerge kelýshiler sany artyp keledi, dep habarlaıdy Almaty-akshamy.kz.
24.kz aqparatyna súıensek, byltyrǵy jylmen salystyrǵanda, oqýshy sany eki esege artqan. Olarǵa qazaqtyń salt-dástúrleri kórsetilip, ulttyq oıyndary nasıhattalady. Nurgúl bala kúninen dombyra tartady. 10-nan astam án biledi. Bolashaqta qazaq tili mamany bolýdy armandaıdy. Bir qyzyǵy, ónerli óren bıyl halyqaralyq baıqaýǵa qatysyp, Qyzylordadaǵy Qorqyt Ata ýnıversıtetine grant utyp alǵan.
«Atajurtqa aıtar alǵysymyz óte sheksiz. Shekaradan attaǵan kezde bizde bir ystyq sezim bolady Otanǵa degen. Tipti kóńilden jylap jiberetindeı dárejede bolǵanbyz. Biz Ózbekstanda turǵanymyzben ózimizdiń qazaq mádenıetimizdi, salt-dástúrimizdi, ádet-ǵuryptamyzdy damytýdan jalyqpaı kele jatqan halyqpyz», - deıdi Ózbekstannan kelgen qandasymyz Nurgúl Oljabaeva.
Demalýǵa kelgen balǵyndardyń barlyǵy túrli baıqaýdyń júldegerleri. Oqýshylardyń deni Reseı, Ózbekstan men Mońǵolıadan kelgen. Al Belorýssıa men Irannan tek bir ǵana oqýshy bar.
Demalys ýaqytynda oqýshylarǵa túrli sabaq uıymdastyrylady. Negizgi ekpin alashtaný men Qazaqstan tarıhyna berilip otyr. Bıyl lagerdegi oqý baǵdarmalasyna birqatar ózgerister de eńgizilgen.
«Osy jyly lagerdiń baǵdarlamasy etno boldy. Aǵylshyn tili joq, tek qana qazaq tili. Dombyra tartý, alashtan, jasandy ıntelektimen jumys isteý sıaqty jańashyldyqtar qostyq. Baǵdarlamaǵa qazaq rýhyn oıatý úshin, qazaq bolamyn degeni úshin aýystyrdyq», - deıdi «Otandastar» qory prezıdentiniń keńesshisi Dıdar Bolat.
Oqýshylar 14 shildege deıin demalady. Jalpy etnıkalyq qazaq balalaryn qoldaý tek osymen ǵana shektelmeıdi. Jyl saıyn qazaqstandyq joǵarǵy oqý oryndarynda ózge memleketterdegi qandastarymyz bilim alýy úshin 6 myń grant bólinedi.