Balalar jylyna oraı otandyq dıplomattar shet memleketterdegi qarakózderimizdiń turmys-tirshiligimen etene tanysýǵa kiristi.
Elimizdiń Belgıadaǵy elshiliginiń konsýly Qazaqstannan bala asyrap alý quqyna ıe belgıalyq agenttik ókilderimen, asyrandy balalarmen kezdesti.
Belgıada qazir 400-den astam qazaqstandyq balǵyn bar. Deni eldiń Flandrıa aımaǵynda turady, dep habarlaıdy Almaty-akshamy.kz Qazaqstan.tv saıtyna silteme jasap.
«Qazaqtar keledi» degendi estip kóppen birge agenttikke alty jastaǵy Aıdyn da asyǵypty. Qarakózi móldirep, tulymshaǵy jelbiregen uldyń Óskemendegi balalar úıinen Belgıaǵa kelgenine bıyl úsh jyl. Qulaǵynda múkisi bolǵandyqtan, kóppen emin-jarqyn áńgimelesýge qysylady-deıdi anasy.
"Mekteptiń birinshi synybynda oqıdy. Jazýdy, oqýdy úırenip júr. Syrtta fýtbol oınaǵandy, júzgendi jaqsy kóredi. Biz ony asyrap alý úshin Qazaqstanda 15 apta boldyq. Qazaqstan qandaı ádemi el ekenin aıtyp otyramyz. 10 jasqa tolǵanda týǵan jerine aparamyz. Sonda ózin ómirge ákelgen ata-anasymen kezdesemin dese, qarsy emespiz", - deıdi Aıdynnyń anasy Sharlott Vanderheıah.
Aıdyn men ózge de qazaqstandyq balǵyndardyń bóten elge baýyr basyp ketýine Saltanat kómektesip júr. Ol Belgıaǵa Qazaqstannan asyrap alynǵan tuńǵysh bala. Ata-anasy Annemı men Pol Semeıdegi balalar úıinen áketkende 1,5 jasta edi. Bıyl 23-ke toldy. Ýnıversıtetti támámdap, qazir «Áleýmettik qyzmetker»retinde osy agenttikte jumys istep júr.
"2019 jyly týǵan jerime birinshi ret saparladym. Astana men Almatyda, ózim dúnıege kelgen Semeıdegi balalar úıinde boldym. Elimiz óte ádemi, tabıǵaty keremet, halqy tamasha. Ózime uqsaǵan adamdardy kórip qýandym. Asyqpaı saıahattap, mádenıetimen tanysý úshin jaqynda taǵy da baramyn. Týǵan anammen kezdeskim keledi. Biraq, ol týraly aqparat az. Tappaı júrmin. Eger sizder ony izdeýge kómektesseńizder, jaqsy bolar edi", - deıdi Qazaqstannan asyrap alynǵan tuńǵysh qyz Saltanat Bertls.
«Belgıalyqtar jáýdirkózderdi janynan artyq baǵalap, bar jaǵdaıyn jasap otyr»-deıdi bala asyrap alý agenttiginiń jetekshisi Annemı Pasqúıs. Osyǵan kóz jetkizý úshin kelgen elimizdiń Belgıadaǵy elshiliginiń konsýly balalarǵa kádesyı tartý etti. Elden kelgen dál osyndaı bazarlyqty dıplomattar jyldyń sońyna deıin Belgıadaǵy barlyq qazaqstandyq asyrandy balalarǵa úlestirmek.