Regbıden Qazaqstan áıelder quramasy Portýgalıada ótken ALGARVE SEVENS týrnıriniń kúmis júldegeri atandy.
Sportty damytý dıreksıasynyń málimetinshe, týrnırge Portýgalıanyń komandalarynan bólek Fransıa, Anglıa, Ispanıa, Gonkong quramalary jáne Eýropanyń basqa da elderi qatysty, dep habarlaıdy Almaty-akshamy.kz 24.kz-ke silteme jasap.
12 ujym jınalǵan týrnırde Anna Iakovleva jattyqtyratyn Qazaqstan qyzdary úzdikter tobynda óner kórsetti. Óz tobynda aldymen dál osy týrnırdiń 2019 jylǵy jeńimpazyn ońaı jeńgen jerlesterimiz odan keıingi oıyndardy da sátti ótkizip, esh qıyndyqsyz fınalǵa shyqty. Alaıda chempıondyq kezdesýde Fransıa arýlarynan jeńilip, kúmisti qanaǵat qyldy. Esep – 14:17.
"Kúzde bizdi Azıa chempıonaty kútip tur. Jyldyń eń mańyzdy týrnıri sol. Qazirden bastap daıyndyqty jan-jaqty pysyqtap jatyrmyz. Ókinishke qaraı, osy týrnırde sary qurlyqtaǵy basty básekelesimiz Gonkongpen kezdese almadyq. Olar basqa topta boldy",- deıdi regbı 7 áıelder quramasynyń bas bapkeri Anna Iakovleva.