Saılaý qorytyndysy boljamdarǵa sáıkes boldy. Óıtkeni, Qasym-Jomart Toqaevtyń qarsylastary álsiz ekenin barlyq sarapshylar da aıtqan.
Saılaýdan keıin qandaı reformalar kútemiz? Búgingi tańda kúsh qurylymdaryn ǵana emes, sot júıesin de reformalaý qajet. Eń aldymen, qoǵamdy ishinen qurtatyn sybaılas jemqorlyqpen kúresý kerek. Halyq Memleket basshysyna senim bildirdi, sondyqtan biz odan el tynyshtyǵyn buzýdy maqsat tutatyndarǵa qatysty naqty áreketter men qatań sharalar qoldanady dep kútemiz.
Halyq eń aldymen ekonomıka salasyndaǵy reformalardy kútedi. Qazaqstandyqtardyń ál-aýqatyn arttyrý qajet. Azamattardyń Qasym-Jomart Toqaevqa senýi qajet. Bul saılaý Jańa Qazaqstannyń qurylysyndaǵy sheshýshi kezeń bolady dep úmittenemiz. Sondaı-aq, bilim, ǵylym júıesi túbegeıli reformalaýdy qajet etedi. Bilim salasynda ne bolyp jatqanyn qaraıyq. Shet memleketter keńestik bilim berý júıesine kóship jatsa, biz únemi túsiniksiz jańalyqtar engizip kelemiz. Aýyl sharýashylyǵy salasynda da bylyq kóp, munyń bári aqshany tıimsiz shashýǵa ákeledi. Osydan aýyl sharýashylyǵy salasynda da reformalar qajet ekenin túsinemiz.
"BAQ týraly" zańǵa da baıypty túzetý qajet. Buryn barlyq buqaralyq aqparat quraldary partıa organdaryna baǵynatyn, qazir tehnologıa dáýirinde kóptegen jeke BAQ ókilderi paıda boldy, baspasózdiń bedeli tómendep, taralymdary da azaıýda, al jýrnalısıkanyń úzdik mamandary PR ındýstrıasyna ketip jatyr. Bul jumystar bir kúndik emes, uzaq ýaqytty talap etetini túsinikti. Q.Toqaevtyń aldaǵy jeti jylǵa arnalǵan jumysy óte kóp. Onyń barlyq josparlary oryndalady dep úmittenemiz.