Búgin Qurmanǵazy atyndaǵy Qazaq ulttyq konservatorıasynyń profesory, belgili kúıshi, shertpe kúı sheberi, QR Eńbek sińirgen qaıratkeri Bilál Alpanuly Ysqaqovtyń 70 jasqa tolýyna oraı uıymdastyrylǵan «Qazirgi zamanǵy shertpe kúı oryndaýshylyq ónerindegi ózekti máseleler» atty Respýblıkalyq dóńgelek ústel ótti.
Alqaly jıynda Qurmanǵazy atyndaǵy konservatorıanyń profesory, QR Eńbek sińirgen qaıratkeri Kárıma Saharbaeva, M.O.Áýezov atyndaǵy Ádebıet jáne óner ınstıtýty «Mýzykataný» bóliminiń meńgerýshisi, ónertaný ǵylymdarynyń kandıdaty Aınur Qaztýǵanova, «Kóne mýzykalyq aspaptar» kafedrasynyń meńgerýshisi Z.İzmuratova, «Dombyra» kafedrasynyń ustazdary Qýanysh Jumaǵalıev, Baıan Igilik, Altynaı Djýmagalıeva, Ásel Alına jáne t.b. Bilál Ysqaqovtyń ómiri men shyǵarmashylyǵy jaıynda baıandama oqydy.
Zertteýshi-ǵalym Aınur Qaztýǵanova «Kúıshiler táliminiń janashyry» atty baıandamasynda Ysqaqov Bilál Alpanulynyń kúıshi-oryndaýshy, kúıshi-ustaz, kúıshi-zertteýshi retinde qyzmetin saralaı kele, «Uly kúıshilerden bastaý alǵan dástúrdi jalǵastyrýshy, ony damytýǵa ózindik úles qosyp, ulttyq kúı ónerin jańa deńgeıge kóterip, bolashaq urpaqqa amanat retinde saqtalýda eleýli eńbek etken tulǵa retinde Bilál Alpanuly Ysqaqov qurmetke laıyq», – dep tujyrymdady.
Sondaı-aq is-sharanyń qurmetti qonaqtary QR Mádenıet qaıratkeri, Qurmet ordeniniń ıegeri, kúıshi Abdýlhamıt Raıymbergenov, Qazaqstannyń Eńbek sińirgen qaıratkeri, kúıshi-kompozıtor Ermurat Úsenov, Qazaq ulttyq óner ýnıversıtetiniń oqytýshysy, rejıser-prodússer Sarybasov Oralbek, «Mýzykataný jáne kompozısıa» kafedrasynyń dosenti, PhD Aıjan Berdibaı, «Halyq áni» kafedrasynyń meńgerýshisi Venera Qarjaýbaeva, PhD, «Daryn» Memlekettik jastar syılyǵynyń ıegeri, «Dombyra» kafedrasynyń dosenti Erjan Jámenkeev jáne Semeıden, Astanadan, Taldyqorǵannan kelgen áriptesteri, shákirtteri ystyq yqylasyn bildirdi.
Dóńgelek ústeldi júrgizgen Toqjanov Tólepbergen mereıtoı ıesine tosyn syı retinde B.Ysqaqov pen T.Toqjanovtyń avtorlyǵymen shyǵarylǵan «Dombyradaǵy oryndaýshylyq óner tarıhy» atty kitapty tartý etip, tusaýyn kesti.
Kúıshi Bilál Alpanuly Ysqaqovtyń mereıtoıy erteń ótetin «Káýsár kúı» atty konsertke ulasady. Konsert Qurmanǵazy atyndaǵy Qazaq ulttyq konservatorıasynyń E.Rahmadıev atyndaǵy Úlken zalyda, saǵat 17:00 ótedi. Kelem deýshilerge esik ashyq.
