Budan bólek óńirdegi tórt mektep qabyrǵaly qalamgerdiń esimin enshilegen
Halyq jazýshysy Sherhan Murtazanyń Jýaly aýdany Talapty aýylynda turǵan úıi mýzeıge aınalady. Bul týraly máslıhat depýtattarymen kezdesýinde Jambyl oblysynyń ákimi Nurjan Nurjigitov aıtty, dep habarlaıdy Almaty-akshamy.kz QazAqparatqa silteme jasap.
Kezdesýde halyq qalaýlylary birqatar máseleni kóterip, oı-usynystaryn jetkizdi.
Erbolat Saýryqov aýyr júk kólikteriniń shamadan tys júktemesiniń saldarynan joldardyń búlinip jatqandyǵyn, Halyq jazýshysy Sherhan Murtazanyń 90 jyldyǵyn keń kólemde atap ótý, oblys ortalyǵynan kóshe atyn berý sekildi máselelerdi kóterdi.
Ózge de halyq qalaýlylary áleýmettik, aýyl sharýashylyǵy, bilim berý salalaryndaǵy máselelerge nazar aýdartty.
Oblys ákimi máslıhattardyń jumysynyń mańyzdylyǵyn basa aıtyp, kóterilgen barlyq máseleler men usynystar eskerilip, qarastyrylatynyn jetkizdi.
Sonyń ishinde Sherhan Murtazanyń 90 jyldyq mereıtoıyn tıisti deńgeıde atap ótý úshin qajetti sharalar qabyldanyp jatqanyn, tulǵanyń Jýalyda ózi turǵan úıinde mýzeıi ashylatynyn atap ótti.
Budan bólek óńirdegi tórt mektep qabyrǵaly qalamgerdiń esimin enshilegen. Birtýar tulǵanyń eskertkishin salý máselesi de qaralýda.
Jalpy, Úkimettiń qaýlysymen Jambyl oblysyndaǵy 43 mektepke Álıhan Bókeıhan, Ahmet Baıtursynuly, Sáken Seıfýllın, Oralhan Bókeı, Maǵjan Jumabaev, Mirjaqyp Dýlatov, Oraz Jandosov, Qanysh Sátpaev, Muhtar Áýezov, Dinmuhamed Qonaev, Asanbaı Asqarov, Sherhan Murtaza sıaqty Alash jáne qoǵam qaıratkerleri, ǵalymdar, jazýshylar men basqa da tarıhı tulǵalardyń esimderi berilgen.
Aıta keteıik, osyǵan deıin, Tarazda Sherhan Murtaza turǵan úıge eskertkish-taqta ornatylǵanyn jazǵan bolatynbyz.