AMANAT partıasy fraksıasynyń múshesi, Májilis depýtaty Erlan Saırov premer-mınıstri Oljas Bektenovke depýtattyq saýal joldap, qoǵamda kúsheıip bara jatqan rýshyldyq pen jikshildikti nasıhattaıtyn trendterdi ulttyq birlikke qaýip retinde baǵalady, - dep habarlaıdy aqshamnews.kz tilshisi.
Depýtattyń aıtýynsha, táýelsizdikti saqtaý úshin qoǵamǵa eń keregi – birlik, tutastyq jáne yntymaq. Alaıda sońǵy ýaqytta áleýmettik jeliler men mádenı ortada kerisinshe halyqty jikteýge beıim úrdister beleń alyp barady.
"Rý ataýyn brendke aınaldyrý" qaýipti tendensıaǵa ulasýy múmkin
Saýalda jekelegen kontent óndirýshiler men kásipkerlerdiń rý ataýyn kúndelikti tutynatyn ónimderge (fýtbolka, shapan jáne t.b.) jazyp, ony "brend", "marketıńtik ónim" retinde satýy synǵa alynady. Depýtat mundaı áreketterdiń jastar arasynda rýshyldyq psıhologıany kúsheıtip, ulttyq tutastyqqa syzat túsirýi múmkin ekenin atap ótedi.
Sondaı-aq, depýtattyń málimdeýinshe, bul úrdis kıno salasyna da jetken: rý salystyrý, kemsitý elementteri bar fılmderdiń prokatqa shyǵýy qoǵamdaǵy sezimtal taqyrypty komersıalyq quralǵa aınaldyrýǵa ákelýi yqtımal.
"Tvorchestvolyq bostandyq qajet. Biraq ol ulttyń birligin buzyp, memlekettiliktiń tamyryn qıýǵa qabiletti deńgeıge shyqpaýy tıis", – delinedi saýalda.
Depýtat usynǵan 3 naqty shara
Erlan Saırov qoǵamdaǵy rýshyldyqty kúsheıtetin ıdeologıalyq ónimderge tosqaýyl qoıý úshin birqatar ınstıtýsıonaldyq qadam usynady:
-
Kınoprokatqa shyǵatyn otandyq fılmderdi aldyn ala saraptaıtyn turaqty komısıa qurý
– kórkemdik-estetıkalyq, ıdeologıalyq jáne ulttyq birlik turǵysynan baǵalaıtyn tetik qajet ekenin aıtady. -
"Ulttyq kod", "mádenı erekshelik" uǵymdaryn jeleý etip, qoǵamdy bólshekteýge baǵyttalǵan áreketterge naqty tosqaýyl qoıý
– rýshyldyq pen jikshildikti nasıhattaıtyn kontentke júıeli túrde shekteý engizýdi usynady. -
Birlikti nyǵaıtatyn jalpyulttyq kontentti kóbeıtý
– mádenıette jáne áleýmettik jelilerde Qazaqstan halqynyń tutastyǵyn aıqyndaıtyn, "Biz Qazaqpyz" maǵynasyna jaqyn kontentti arttyrý qajet ekenin jetkizedi.
"Ulttyń eń sezimtal taqyryby oıynshyqqa aınalmaýǵa tıis"
Depýtat saýalynda rýshyldyqty ulttyń ishinen iritetin qaýipti qubylys retinde sıpattap, onyń memlekettik oılaýǵa keri áser etetinin alǵa tartady. Bul rette Abaıdyń "Atanyń balasy bolma, adamnyń balasy bol" degen sózin mysalǵa keltirip, ult retinde ilgerileýdiń sharty – azamattyq tutastyq ekenin meńzeıdi.
Saýal sońynda Memleket basshysynyń "bárimiz bir ult bolyp eńbek etýimiz kerek" degen ustanymy eske salynyp, ulttyq birlik memleket saıasatynyń ózegi ekeni kórsetiledi.