AMANAT partıyasy fraktsıyasynyń múshesí, Májílís deputaty Erlan Saırov premer-mınıstrí Oljas Bektenovke deputattyq saual joldap, qoǵamda kúsheıíp bara jatqan rushyldyq pen jíkshíldíktí nasıhattaıtyn trendterdí ūlttyq bírlíkke qauíp retínde baǵalady, - dep habarlaıdy aqshamnews.kz tílshísí.
Deputattyń aıtuynsha, táuelsízdíktí saqtau úshín qoǵamǵa eń keregí – bírlík, tūtastyq jáne yntymaq. Alaıda sońǵy uaqytta áleumettík jelíler men mádenı ortada kerísínshe halyqty jíkteuge beıím úrdíster beleń alyp barady.
"Ru atauyn brendke aınaldyru" qauíptí tendentsıyaǵa ūlasuy múmkín
Saualda jekelegen kontent óndírushíler men kásípkerlerdíń ru atauyn kúndelíktí tūtynatyn ónímderge (futbolka, shapan jáne t.b.) jazyp, ony "brend", "marketıngtík óním" retínde satuy synǵa alynady. Deputat mūndaı áreketterdíń jastar arasynda rushyldyq psıhologıyany kúsheıtíp, ūlttyq tūtastyqqa syzat túsíruí múmkín ekenín atap ótedí.
Sondaı-aq, deputattyń málímdeuínshe, būl úrdís kıno salasyna da jetken: ru salystyru, kemsítu elementterí bar fılmderdíń prokatqa shyǵuy qoǵamdaǵy sezímtal taqyrypty kommertsıyalyq qūralǵa aınaldyruǵa ákeluí yqtımal.
"Tvorchestvolyq bostandyq qajet. Bíraq ol ūlttyń bírlígín būzyp, memlekettílíktíń tamyryn qıyuǵa qabílettí deńgeıge shyqpauy tıís", – delínedí saualda.
Deputat ūsynǵan 3 naqty shara
Erlan Saırov qoǵamdaǵy rushyldyqty kúsheıtetín ıdeologıyalyq ónímderge tosqauyl qoyu úshín bírqatar ınstıtutsıonaldyq qadam ūsynady:
-
Kınoprokatqa shyǵatyn otandyq fılmderdí aldyn ala saraptaıtyn tūraqty komıssıya qūru
– kórkemdík-estetıkalyq, ıdeologıyalyq jáne ūlttyq bírlík tūrǵysynan baǵalaıtyn tetík qajet ekenín aıtady. -
"Ūlttyq kod", "mádenı erekshelík" ūǵymdaryn jeleu etíp, qoǵamdy bólshekteuge baǵyttalǵan áreketterge naqty tosqauyl qoyu
– rushyldyq pen jíkshíldíktí nasıhattaıtyn kontentke júıelí túrde shekteu engízudí ūsynady. -
Bírlíktí nyǵaıtatyn jalpyūlttyq kontenttí kóbeıtu
– mádenıette jáne áleumettík jelílerde Qazaqstan halqynyń tūtastyǵyn aıqyndaıtyn, "Bíz Qazaqpyz" maǵynasyna jaqyn kontenttí arttyru qajet ekenín jetkízedí.
"Ūlttyń eń sezímtal taqyryby oıynshyqqa aınalmauǵa tıís"
Deputat saualynda rushyldyqty ūlttyń íshínen írítetín qauíptí qūbylys retínde sıpattap, onyń memlekettík oılauǵa kerí áser etetínín alǵa tartady. Būl rette Abaıdyń "Atanyń balasy bolma, adamnyń balasy bol" degen sózín mysalǵa keltíríp, ūlt retínde ílgeríleudíń sharty – azamattyq tūtastyq ekenín meńzeıdí.
Saual sońynda Memleket basshysynyń "bárímíz bír ūlt bolyp eńbek etuímíz kerek" degen ūstanymy eske salynyp, ūlttyq bírlík memleket sayasatynyń ózegí ekení kórsetíledí.