Memleket basshysy Qasym-Jomart Toqaev «Ana tili» gazetine bergen suhbatynda el damýy, ádilettilik pen jastardyń róli týraly mańyzdy máselelerdi kóterdi.
«Qaıyrymdylyq pen ádilettilik jolynda: Jastar men Prezıdentke degen senim»
Prezıdent halyqaralyq máselelerge kóbirek kóńil bóledi degenge aıtarym, bizdiń Prezıdentimiz jer júzin áldeqashan aralap shyqqan adam! Ol endi shetelderge qydyrý úshin baryp júrgen joq. Óziniń bilimi men tiliniń jetistigimen, parasatymen Qazaqstandy jer júzine pash etti.
Buryn balalarymyz «Shetelde osy kúnge deıin Qazaqstannyń kóshelerinde túıe júrgendeı kóretinder bar» dep renjıtin. Endi bári ózgergenine eń aldymen jastarymyz qýanyp júr. Úkimettiń sharýasy men Prezıdenttiń sharýasyn shatastyra beremiz. Osy kúnge deıin avtobýs toqtap qalsa, «Prezıdent qaıda qarap otyr?» deıtinder de az emes.
Bizdiń úkimettiń myńdaǵan ákimderi, júzdegen mınıstrleri men úlkendi-kishi sheneýnikteri barshylyq. Solardyń aldyna qoıylatyn talaptar óte joǵary deńgeıde bolýy kerek!
Jalpaq shesheı bolýdan arylmaı júrgen basshylardyń ornyna jańasha ómirge beıim, urlyq jasaýdy úırenip úlgermegen, bilimdi jastardy ákelý kerek!
***
Apat kezinde halqymyz ádettegideı óre túregelip, árkim qolynan kelgenshe járdemderin berip jatady. Kúrdeli sátterde qordalanǵan keleńsizdikterdiń beti ashylatyny aıqyn.
«Qaıyrymdylyq qazaqtyń júreginiń ortasyna oıyp jazylǵan» deýshi edi meniń ákem. Apattyń aıtyp kelmeıtinin, sol kezde halyqtan qarajatty qaıyrymdylyq qorlar jınaýǵa mindetti emes ekenin, esep-shot ákimshiliktiń janynan ashylýy tıis ekenin, ár qaıyrymdylyq qordyń óziniń mindeti men maqsaty bolatynyn men 32 jyl boıy aıtyp kelemin. Qaıyrymdylyq degen sózdi betterine ustap, ózderiniń aram pıǵyldaryn iske asyryp júrgender de az emes.
Jaqynda sondaı bir áıeldi 6 jyl, 6 aıǵa túrmege otyrǵyzdyq. Osydan keıin qaıyrymdylyqqa basqa túgili jastar da senbeıdi. Qaıyrymdylyqqa halyqtyń kózqarasy ózgere bastaǵany 32 jyldan beri arasyna kún salmaı qaıyrymdylyqpen aınalysyp kele jatqany meniń janyma batady.
***
Osydan tórt jyl buryn «Nazarbaev qyzmetinen ketkeli tipti joǵarylady, endi Prezıdent te oǵan baǵynady» degen sóz júrip jatqanda men «Ana tili» gazetine «Ult josparynyń tiregi – ádiletti úkimet» (14.09.2020 jyl) degen maqala jazǵanmyn. Sonda «Nursultan Ábishulyna meniń de ókpem jetkilikti-aq edi, biraq, shyndyqpen betpe-bet kelgende, ókpege bıigimnen qaraıtyn minezimnen aınyǵan emespin.
Qazaq eliniń bolashaǵyn oılap, bilikti, bilimdi, parasatty, alys-jaqyn elderdiń syry men qyryn jaqsy biletin, tájirıbesi mol, tekti azamattyń uly Qasym-Jomart Kemelulyna senim bildirip, qoldaý kórsetkeni úshin Elbasymyz Nursultan Ábishulyna rızashylyǵymdy bildirip, alǵys aıtamyn» dep jazyppyn. Sol maqalamda «Jaýdy aıaǵan jaraly» degen sózim de bar. Osy maqalamdy «Taýqymet» atty kitabyma da kirgizdim, sebebi bul shynynda tarıh!
***
Jaqsy men jamandy saraptaı alatyn bilimdi jastarymyzdyń da ózgerip, birneshe jyldyq ómirlerine jospar jasaıtyndaı jaǵdaıǵa jetip jatqany da bizdi qýantady. Ádil sóıleýdi birimizden birimiz talap etip jatyrmyz ǵoı, bireýdiń eńbegin baǵalaý da, jaqsynyń jaqsylyǵyn aıtý da ádildik!
Jastar «Qasym-Jomart Kemeluly aldyna qoıyp otyrǵan josparlaryn iske asyrý úshin keminde 20 jyl Prezıdent bolýy kerek. Ol úshin Qazaqstannyń azamatymyn deıtin árbir adam Prezıdentimizge kómekshi bola alatyndaı óz eliniń patrıoty bolýǵa mindetti» degenderin estý de biz sıaqty talaı taýqymetti bastarynan ótkizgender úshin úlken qýanysh!