Shekaradan 30 keliden asa geroın alyp ótpek bolǵan sheteldikke sot úkimi shyqty.
Túrkistan oblysynda 30 keliden astam geroındi Reseıge tasymaldamaq bolǵan sheteldikke sot úkimi shyqty. Bul týraly oblystyq sottyń baspasóz qyzmeti málimdedi, dep habarlaıdy Almaty-akshamy.kz
Oblystyq sottyń baspasóz qyzmetiniń málimetinshe, shetel azamaty 2022 jyldyń 22 shildesinde saǵat 18.00 shamasynda ózine tıesili «Ǵord Mondeo» avtokóligimen Ózbekstannyń «Gısht-kýprık» shekara baqylaý beketinen ótken. Sodan Qazaqstan Respýblıkasynyń «Jibek joly» memlekettik shekara baqylaý beketine kelip toqtaǵan.
Qazaqstannyń Ulttyq Qaýipsizdik komıtetiniń shekara baqylaý bóliminiń kınolog mamany «Belka» laqap atty qyzmettik ıtpen tájikstandyqtyń basqarýyndaǵy kólikti teksergen. Tekserý barysynda kóliktiń astyńǵy jaǵynda ornalasqan janar-jaǵarmaı baginde jasyrylǵan 63 dana tússiz polıetılen paketterge oralǵan zattar tabylǵan. Tabylǵan zat 31 kılogramm 465,2 gram geroın bolyp shyqqan.
Sottalýshyǵa Qylmystyq kodekstiń 24-baby 3-bóligi (Qylmysqa daıyndalý jáne oqtalý/aıaqtalmaǵan qylmys), 286-baby 4-bóligi (Aınalysy shektelgen zattardyń kontrabandasy) jáne 297-baby 3-bóligi 3-tarmaǵymen (Asa iri mólsherdegi esirtki zattaryn ótkizý maqsatynda zańsyz daıyndaý, saqtaý, tasymaldaý, ótkizý) aıyp taǵyldy.
«Tájikstan azamaty óz kinásin ishinara moıyndap, sottan jeńil jaza taǵaıyndaýyn surady. Sot úkimimen sottalýshy ózine taǵylǵan aıyptar boıynsha kináli dep tanylyp, oǵan túpkilikti 15 jyl merzimge bas bostandyǵynan aıyrý jazasy taǵaıyndaldy», - delingen habarlamada.
Sheteldik azamat jazasyn qylmystyq-atqarý júıesiniń qaýipsizdigi barynsha joǵary túzeý mekemesinde óteıtin bolady.
Úkim zańdy kúshine engen joq.