«Bolashaq» baǵdarlamasynyń úmitkerlerine qoıylatyn talaptar kúsheıtildi.
Bıylǵy jyldan bastap «Bolashaq» baǵdarlamasy stıpendıasynyń úmitkerlerine qoıylatyn talaptar kúsheıtildi. Endi «Bolashaq» baǵdarlamasynyń konkýrstyq irikteýine qatysý úshin úmitkerler shet tilin meńgergenin rastaýy tıis, dep habarlaıdy Almaty-akshamy.kz.
Kandıdattar ótinim bergen kezde, shet tilinen emtıhan tapsyrǵany týraly sertıfıkat usynady. Mysalǵa, aǵylshyn tilinde magıstratýraǵa túsýshiler nátıjesi 9.0-den kem degende 6.0 IELTS, PBT 677- den 498, IBT 120- dan 60 TOEFL sertıfıkattaryn, taǵylymdamadan ótýshiler - IELTS 5.0, PBT-417, IBT-35 TOEFL, DET 75 sertıfıkattaryn usynýy tıis.
«Bıyl «Bolashaq» baǵdarlamasynyń konkýrstyq irikteý erejeleri jetildirildi. Bul shara kandıdattardyń quramyn sapalyq jaǵynan arttyrý úshin qabyldandy. Sheteldik joǵary oqý ornynyń doktorantýrasyna túsetin qazaqstandyqtardy qospaǵanda, «Bolashaq» baǵdarlamasynyń úmitkerleri shet tilin meńgerýdiń joǵary deńgeıin rastaýy qajet», - dep atap ótti «Halyqaralyq baǵdarlamalar ortalyǵy» AQ Basqarma tóraǵasy Oljas Sákenov.
Esterińizge sala keteıik, 2020 jyldan bastap «Bolashaq» stıpendıasyn taǵaıyndaý konkýrsyna jeńildigi bar kandıdattardy qospaǵanda, jetekshi sheteldik joǵary oqý ornynan shartsyz shaqyrýy bar úmitkerler ǵana qatysa alady. Sonymen qatar V1 jáne odan joǵary deńgeıi bar memlekettik tilden emtıhan tapsyrǵany týraly QAZTEST sertıfıkatyn usyný talaby da qoıylady. Bıylǵy jyly «Bolashaq» baǵdarlamasy aıasynda 555 stıpendıa bólindi. Onyń ishinde 395 stıpendıa magıstratýra/rezıdentýra, 50 – doktorantýra baǵdarlamalaryna úlestirilgen, sondaı-aq taǵylymdamadan ótý úshin 110 stıpendıa bólindi.
Aıta keteıik, qujat qabyldaý jáne konkýrstyq irikteý tolyǵymen avtomattandyrylǵan. Bul halyqaralyq stıpendıa taǵaıyndaý konkýrsynyń ashyqtyǵyn qamtamasyz etedi. Úmitkerler óńirlerden shyqpaı-aq ótinim beredi jáne irikteýdiń barlyq kezeńderinen ótedi.