QR Aýyl sharýashylyǵy mınıstrligi qyrǵyz mamandarymen birlesip, shegirtke taralý oshaqtaryn baqylaý úshin shekaralas aýmaqtardy tekserýdi bastady.
Buǵan deıin Ózbekstanmen shekarada osyǵan uqsas sharalar júrgizilgen bolatyn. Bul týraly Premer-mınıstrdiń orynbasary – ulttyq ekonomıka mınıstri Serik Jumanǵarınniń tóraǵalyǵymen ótken shegirtkeniń taralýyna qarsy is-qımyl jónindegi Respýblıkalyq shtab otyrysynda aýyl sharýashylyǵy vıse-mınıstri Ermek Kenjehanuly habarlady.
Vıse-mınıstrdiń málimetinshe, qazirgi ýaqytta Ózbekstanmen shekaralas aýmaqtarda marokkalyq jáne basqa da toptasatyn shegirtke oshaqtary anyqtalmaǵan.
«Búgin qyrǵyz tarapymen shekaradaǵy qazaqstandyq ýchaskelerinde birlesken tekserýdi bastadyq. Shegirtke zıankesteriniń negizgi oshaqtary Qyrǵyzstannyń ońtústik aımaqtarynda shoǵyrlanǵan. Alaıda, qazirgi ýaqytta jándikterdiń Qazaqstan baǵytynda taralý qaýpi tirkelmegen», — dedi Ermek Kenjehanuly.
Sonymen qatar Reseı Federasıasymen shekarada da tekserýler jalǵasýda. Abaı jáne Soltústik Qazaqstan oblystaryndaǵy shekaralas ýchaskeler tekserildi — shegirtke zıankesteriniń taralý jaǵdaılary anyqtalmady. Aldaǵy kúnderi, maýsymnyń birinshi jáne ekinshi onkúndiginde Aqtóbe, Atyraý, Batys Qazaqstan, Qostanaı, Shyǵys Qazaqstan jáne Pavlodar oblystarynda osyǵan uqsas sharalardy ótkizý josparlanýda.
Qytaıdyń shekaralas aımaqtaryna keletin bolsaq, qazirgi ýaqytta shegirtkeniń taralýy týraly resmı rastalǵan jaǵdaılar tirkelmegen.
2 maýsymdaǵy jaǵdaı boıynsha 6,1 mln gektar aýmaq tekserildi, bul josparlanǵan kólemniń 35,6%-yn quraıdy. Hımıalyq óńdeýge 1 mln ga asa aýmaq jatady, onyń 971,5 myń ga óńdeldi, bul boljanǵan 2,1 mln gektardyń 46,3%-yn quraıdy.
Qazirgi ýaqytta óńdeý jumystary 15 oblysta júrgizilýde. Soltústik Qazaqstan oblysynda sharalar zıankesterdiń alǵashqy oshaqtary paıda bolǵan kezde bastalady. Barlyǵy 443 búrikkish tehnıka birligi jumyldyrylǵan, aımaqtar qajetti resýrstarmen qamtamasyz etilgen.
Shtab otyrysynyń qorytyndysy boıynsha vıse-premer Serik Jumanǵarın negizgi qorǵanys sharalary is júzinde aıaqtalǵan aımaqtardan tehnıkany shegirtkeniń taralý yqtımaldyǵy joǵary Aqtóbe jáne Qostanaı oblystaryna jedel túrde aýystyrýdy tapsyrdy.