Túrkistan oblysyna jumys sapary barysynda aýyl sharýashylyǵy mınıstri Aıdarbek Saparov jergilikti sharýalarǵa shegirtke zıankesterine qarsy óńdeletin aýmaqtardy anyqtaý jáne óńdeý máseleleri Premer-Mınıstrdiń erekshe baqylaýynda ekenin jetkizdi.
Sondaı-aq mınıstr ASHM shegirtkelerdiń egistik jerlerdi basyp qalýyn boldyrmaý jáne aýyl sharýashylyǵy qurylymdaryna zalalyn tıgizbeý maqsatynda qabyldanyp jatqan sharalar týraly aıtty, dep habarlaıdy Almaty-akshamy.kz.
2024 jyly zıankes jándikterdiń taralýynyń tabıǵı ósimi baıqalady. Olardyń taralý aýmaǵynyń artýy 2023 jyly da anyqtalǵan bolatyn. Sol kezde 1,5 mln ga aýmaq óńdeldi. Al bıyl shegirtke zıankesterine qarsy óńdeý josparlanǵan aýmaq – 2,5 mln ga, onyń ishinde Túrkistan oblysy boıynsha – 271 myń ga.
«Bıyl 2,5 mln ga óńdeý josparlanǵan, bul – sońǵy jyldary (2016 jyldan bastap) hımıalyq óńdeý júrgiziletin eń aýqymdy aýmaq. 2023 jyldaǵydan 1 mln gektarǵa artyq. Salystyrmaly túrde aıtar bolsaq, bizdegi óńdeletin jer Ortalyq Azıanyń barlyq eli óńdeıtin aýmaqtardy qosqannan da kóp», — dep atap ótti Aıdarbek Saparov.
Mınıstr monıtorıń pen óńdeý úshin negizgi jáne qosymsha resýrstar tartylǵanyn atap ótti.
Atap aıtqanda, el boıynsha 2,5 myńnan astam maman, 427 arnaıy tehnıka: 289 jer ústi jeldetkish pen shtangaly búrikkish, 56 aerozoldi gaz generatory, 36 asa jeńil áýe tehnıkasy, 36 ushaq jumyldyrylǵan.
Bıyl alǵash ret naqty nysandardy óńdeýge drondar tartyldy, bul jetýi qıyn jerlerdegi jumysty jeńildetti.
«Sonymen qatar kórshilermen jáne halyqaralyq uıymdarmen jumys istep jatyrmyz. Ótken jumada ǵana, 7 maýsymda biz FAO alańynda shegirtkege qarsy kúres máselesi boıynsha Ortalyq Azıa elderiniń aýyl sharýashylyǵy mınıstrleriniń kezdesýin ótkizdik. Kúsh-jigerdi úılestirý talqylandy. Reseı tarapymen keńes ótkizildi. Ózbek áriptestermen birlesken óńdeý jumystary júrgizilip jatyr», — dep túıindedi Aıdarbek Saparov.