10 tamyzda 56 jastaǵy amerıkalyq pop-dıva Djennıfer Lopes Almatyda alǵash ret óner kórsetti. Álemdik Up All Night týry aıasynda ótken shoý qaladaǵy Ortalyq stadıonda ótti. Qaýipsizdikti eki myńnan astam polısıa jáne alty júz áskerı qadaǵalady, al 300-ge jýyq erikti qonaqtarǵa oryndaryn tabýǵa kómektesti. Al beıresmı jaıttardan ne este qaldy? Aqshamnews.kz materıalynan bilińiz.
"Kópten kútken uly toı"
Mamyrdan bastap jurt asyǵa kútken keshke kópshilik konsert kúni tańmen talasa jetti. Kelýshilerdiń qatarynda Ortalyq stadıon mańyna tańǵy 9-da barǵandar da bolǵan eken. Al eriktiler men uıymdastyrýshylar erterek kelip, daıyndyqqa kiristi.
Djennıfer Lopestiń Up All Night atty álemdik týry aıasyndaǵy kópten kútken konserti úshin qalaǵa 8 myńnan asa týrıs arnaıy keldi. Aldyn ala málimetke súıensek, kórermenderdiń úshten biri – álemniń túkpir-túkpirinen kelgen qonaqtar.
Konsert bıletteri túgeldeı satylyp ketken. Olardy 35-ten asa eldiń turǵyndary satyp alǵan. Eń kóp qyzyǵýshylyq tanytqandar: TMD elderi, Eýropa, AQSH, BAÁ, sondaı-aq Kanada, Túrkıa, Japonıa, Qytaı jáne Ońtústik Koreıa azamattary.
sýret: Samat Qusaıynov
Djeı Lo sahnada
Djennıfer Lopes sahnaǵa shamamen keshki 9-ǵa qaraı shyqty. Oǵan deıin ánshi Sadraddın kórermenderdiń kóńilin aýlap ánderin shyrqady.
Stadıonǵa jıylǵan jurt Djeı Lony kórgende birneshe saǵat boıy kútken tózimderin de, sharshaǵan sezimderin de umytty. 20 myńnan astam halyqty kórgen Lopes te qýanyshyn jasyrmaı, kózine jas aldy.
sýret: Samat Qusaıynov
Gúlge tolǵan qushaq
Astanada Djennıfer Lopeske jankúıerler 3 tal raýshan gúlin syılasa, Almatyda ony úlken gúl shoqtarymen qarsy aldy. Ár qaladaǵy bul jyly syılyqtar álemdik juldyzdy qýantty, al jankúıerlerdiń shynaıy yqylasy keshtiń erekshe kórinisteriniń birine aınaldy.
Lopes jasaǵan gender patı
Konsert barysynda erekshe sátterdiń biri — jas jup ánshige konvert berip, bolashaq balasynyń jynysyn jarıalaýdy ótindi. Lopes mıkrofonnan: "It’s a girl" dep jarıalap, stadıondy shattyqqa bóledi.
Jelidegi kópshilik "endi bular qyzynyń atyn Djenııfer dep qoıatyn shyǵar" dep ázildep jatty.
"Baqytty shegirtke"
Konsert kezinde Djeı Lonyń ústine shegirtke shyǵyp aldy. Moınyna qonǵan shegirtkeni Djennıfer sabyrmen qabyldap, qolymen qaǵyp jiberip, kúlimsirep, óner kórsetýin jalǵastyra berdi.
Keıin bul jándikti Aısultan esimdi qazaqstandyq ustap, áleýmettik jelide ázildep "satylymǵa" qoıyp, ony Astanadan páterge aıyrbastaýdy usyndy. Shegirtkege ol sımvoldyq túrde "Mark Entonı" degen at berdi.
Djeı Lo komandasyndaǵy vokalıst qazaqstandyq shokoladǵa "ǵashyq boldy"
Amerıkalyq ánshi, Lopestiń komandasyndaǵy vokalıst Sheron áleýmettik jelide "Kazakhstan" qara shokoladynyń sýretin jarıalap, ony "ómirindegi eń dámdi shokolad" dep atady. Jazba jelide tez tarap, kóp uzamaı qonaq úı qyzmetkerleri oǵan otandyq óndirýshiden bir qorap shokolad syıǵa tartty.
Ol qazaqstandyqtardyń qonaqjaılyǵy men aq peıiline rıza ekenin jetkizdi.
Almatylyq otbasynyń dastarhanynan dám tatqan bas gıtarıst
Djeı Lonyń kelýimen este qalǵan taǵy bir qyzyq oqıǵa: almatylyq otbasy Lopestiń bas gıtarısin úıinde qonaq etip, sarqyt salyp jibergen. Bota esimdi qala turǵynynyń aıtýynsha, oǵan inisi 15 mınýt buryn telefon shalyp, úıine qonaqpen kele jatqanyn aıtqan. Qonaqtyń kim ekenin suraǵanda, ol Djeı Lonyń bas gıtarısi ekenin jetkizgen. İnisi gıtarıspen basketbol alańynda kezdeısoq tanysyp, úıge qonaqqa shaqyrǵan.
Aıta keteıik, Astanada Djennıfer Lopestiń konsertin uıymdastyrǵan prodúser Málik Hasenovtiń aıtýynsha, qazirgi ýaqytta áıgili ánshi Shakıramen kelissózder júrgizilip jatyr. Aldaǵý ýaqytta Qazaqstanda endi Shakıra konsert berýi múmkin. Sondaı-aq, 19 qyrkúıekte Ortalyq stadıonda Backstreet Boys óner kórsetedi. Eki kúnnen keıin 21 qyrkúıekte top elordadaǵy "Astana Arenada" konsert ótkizedi.