2024 jyly kóktemgi egis jáne egin jınaý jumystaryna alǵash ret 5% jeńildikpen 400 mlrd teńge kóleminde qosymsha qarajat bólindi.
Nesıeler «Keń dala-2» baǵdarlamasy boıynsha bólinip, «Agrarlyq nesıe korporasıasy» AQ fılıaldary, nesıe seriktestikteri jáne ekinshi deńgeıli bankter arqyly iske asyrylady, dep habarlaıdy Almaty-akshamy.kz Aýyl sharýashylyǵy mınıstrligine silteme jasap.
2021 jyldan bastap baǵdarlama operatory – «Agrarlyq nesıe korporasıasy» AQ arqyly kóktemgi egis jáne egin jınaý jumystaryn tikeleı jeńildetilgen nesıelendirýge 140 mlrd teńge kóleminde búdjet qarajaty bólinip kelgen. «Azyq-túlik korporasıasy» UK» AQ arqyly forvardtyq satyp alý baǵdarlamasyn júzege asyrýǵa taǵy shamamen 40 mlrd teńge qarastyrylǵan. Egindi nesıelendirýge barlyǵy 180 mlrd teńge bólindi.
Qarjylandyrýdyń qosymsha kólemderi.
Bıylǵy jyly qolda bar qarjylandyrý kólemine «Keń dala-2» baǵdarlamasy boıynsha qosymsha 400 mlrd teńge tartý múmkindigi bar. Bul maqsatqa «Báıterek» UBH» AQ jelisi boıynsha 300 mlrd teńge tartylady.
Aýyl sharýashylyǵy taýar óndirýshileri jyldyq 5 paıyzdyq mólsherlememen nesıe ala alady. Nesıe merzimi – 12 aıǵa deıin. «Keń dala-2» baǵdarlamasyna ótinishter 29 sáýirden bastap qabyldanýda.
Búgingi tańda 600-den astam sharýa qojalyǵy jalpy somasy 46,6 mlrd teńgege ótinim berdi, bul 425 myń gektar egis alqabyn nesıemen qamtýǵa múmkindik beredi. Belsendi jumys jalǵasýda, ANK fılıaldary ótinishterdi demalys kúnderi de senbi jáne jeksenbi de qabyldaıdy.
Qoldanystaǵy tetikterge ózgerister.
QR Aýyl sharýashylyǵy mınıstrligi jeńildikti nesıelendirýdiń qosymsha kólemin qamtamasyz etý úshin sýbsıdıalaýdyń qoldanystaǵy tetikterine ózgerister engizýdi kózdeıdi.
Birinshiden, fermerler 5 paıyzdan aspaıtyn jeńildik mólsherlemesi boıynsha nesıe alady, bul paıyzdyq mólsherlemeni sýbsıdıalaýǵa qarajattyń bolýyna baılanysty emes.
Ekinshiden, nesıeler boıynsha kepildi qamtamasyz etý jaǵdaıyn jaqsartý úshin nesıe sharty somasynyń 85% mólsherinde kepildik tetigi qarastyrylǵan.
Búdjet qarajaty
Nesıelerdi arzandatý úshin jáne kepildik berý tetigine respýblıkalyq búdjetten 60 mlrd teńge, onyń ishinde kýpondyq syıaqyny sýbsıdıalaýǵa - 45 mlrd teńge, qaryzdardy kepildendirýge - 15 mlrd teńge, sondaı-aq jergilikti búdjetterdiń qarajaty esebinen 37,3 mlrd teńge bólinedi.
Kepildi qamtamasyz etý
Qaryz alýshy «Damý» kásipkerlikti damytý qory» AQ-dan kepildik alýǵa, al qaryzdyń qalǵan somasyna jáne syıaqyǵa «Agrarlyq nesıe korporasıasy» AQ-nyń kepildik saıasatynyń talaptaryna sáıkes qamtamasyz etýdi usynýǵa quqyly. Nemese qaryzdyń tolyq somasyna ANK kepil saıasatynyń talaptaryna jaýap beretin kepildi qamtamasyz etý. Ekinshi deńgeıli bank arnalary boıynsha qarjylandyrý kezinde ekinshi deńgeıli bankterdiń kepil saıasaty qoldanylady.