Májilismender qazaqtyń sporttyq jylqy tuqymyn saqtaýǵa jáne kóbeıtýge baǵyttalǵan zań jobasynyń túzetýlerin maquldady
Zań jobasynyń negizgi maqsaty – otandyq sporttyq jylqylardyń tuqymyn qalpyna keltirý jáne olardyń asyl tuqymdyq qasıetterin memlekettik qoldaý arqyly jaqsartý.
Túzetýler QR Parlamenti Májilisiniń depýtaty, Respublica partıasy fraksıasynyń jetekshisi Aıdarbek Qojanazarovtyń bastamasymen usynylǵan, dep habarlaıdy Almaty-akshamy.kz.
Byltyr maýsymda depýtat bul máseleni Májilistiń Agrarlyq máseleler komıtetiniń otyrysynda kótergen.1969 jyly elimizde 44 myńnan astam «Qostanaı» jylqy tuqymy tirkelgen, ıaǵnı barlyq asyl tuqymdy jylqylardyń jalpy sanynyń 9,7 % quraǵan. Alaıda búginde «Qostanaı» jylqy tuqymynyń resmı tirkelgen sany 270 bastan aspaıdy, al «Adaı» jylqy tuqymynyń 1300 basy tirkelgen.
«Qazaqstanda sút jáne et baǵytyndaǵy asyl tuqymdy jylqylardy ósirý jaǵynan qoldaý kórsetiledi. Biraq at sporty túrlerin damytýǵa eshqandaı qoldaý qarastyrylmaǵan. Eń ókinishtisi, ulttyq sport túrlerinen bizdiń sportshylar qyrǵyz, orys jáne basqa elderden satyp alynǵan attardy minip, eń jýırikteri Ózbekstanǵa satylyp ketedi. Osyǵan baılanysty biz otandyq jylqy tuqymyn saqtaý men ósimin molaıtýǵa baǵyttalǵan Zań jobasyn ázirleý týraly sheshim qabyldadyq. Atap aıtqanda, eki tuqymdy erekshe atap ótemiz: «Qostanaı» jáne «Adaı», olar ózderiniń qundylyǵyn dáleldegen. Asyl tuqymdy jylqylardy qoldaý jáne ósirý arqyly ulttyq sportty damytý qazaq mádenıeti men salt-dástúriniń damýyna jaqsy serpin beredi», – dedi Aıdarbek Qojanazarov.
Respublica partıasynyń parlamenttik fraksıasy men bir top pikirles depýtattar bastamashy bolǵan zań jobasymen «Asyl tuqymdy mal sharýashylyǵy týraly» jáne «Seleksıalyq jetistikterdi qorǵaý týraly» Qazaqstan Respýblıkasynyń zańdaryna ózgerister men tolyqtyrýlar engiziledi. Túzetýler asyl tuqymdy ortalyqtardyń sheteldik seleksıanyń sporttyq baǵytyndaǵy asyl tuqymdy aıǵyrlardy satyp alý, asyl tuqymdy analyq mal basymen seleksıalyq-asyl tuqymdyq jumys júrgizý, olardy ustaý boıynsha shyǵyndardy óteýdi kózdeıdi.
Atalǵan qoldaý tetikteri otandyq sporttyq baǵyttaǵy jylqy tuqymdaryn damytýǵa jaǵdaı jasap, báıge, kókpar, aýdaryspaq, jamby atý, teńge alý syndy ulttyq at sporty túrlerin buqaralyq damytýǵa yqpalyn tıgizedi.