Qazirgi tańda umra saparyna barýdyń jańa bir tásili paıda boldy. Iaǵnı, birneshe adam «qara kasa» oınap, aralarynan kezekpen bir adamdy aı saıyn umraǵa jiberip otyrady eken, dep habarlaıdy almaty-akshamy.kz muftyat.kz silteme jasap.
Máselen, on kisi birigip, ár aıda bireýin umraǵa jiberý maqsatynda «chernaıa» kasa» oınaıdy. Umra saparynyń qarajaty 700 myń teńge bolsa, árbiri saparǵa shyǵatyn adamǵa 70 myń teńgeden jınap berýge kelisedi. Solaısha belgili ýaqyt ishinde on adamnyń barlyǵy umrany oryndap qaıtady. Al umraǵa baratyn adamdy olar qura tastap anyqtaýlary múmkin.
Keıbir ǵalymdar mundaı jolmen umraǵa barýdy súnnet de, mustahap da emes dep sanaıdy. Iaǵnı, jalpy aıtqanda, bulaı istemegen jaqsyraq, deıdi. Sebebi, umraǵa aldyn baryp kelgen adam keıin baratyn adamdardyń aqshasyn qaıtarady. Demek ol adam umraǵa qaryz alyp baryp kelgen bolyp tur. Bul is – mákrýh. Óıtkeni, «Alla Taǵala eshbir adamǵa shamasy kelmeıtin mindetti júktemeıdi» («Baqara» súresi, 286-aıat). Shamasy kelmeıtin adamnyń qajylyq pen umra ǵıbadatyn oryndaýy da mindet emes.
Alla Taǵala Quranda: «Jaqsylyq jáne taqýalyq jolynda bir-birińe járdemshi bolyńdar», – dep buıyrady («Maıda» súresi, 2-aıat). Bul aıattan úılený, úı salý, qaryzdy óteý jáne basqa qajetti isterge járdemdesý kerekti túsiniledi. Al, qaryz alyp umraǵa barýdy járdem dep naqty aıtý qıyn.
Sharıǵatymyzda qajetti isterge jáne qatty qınalǵan jaǵdaıda ǵana qaryz alýǵa buıyrylady. Al, umra ǵıbadaty mindettelgen qulshylyqqa jatpaıdy. Sondyqtan umra saparyna baratyn adam múmkindik bolsa, qaryzdanbaýy kerek.