Bakalavr baǵdarlamasy boıynsha oqıtyndardyń shákirtaqysy 20%-ǵa, al magıstranttar men doktoranttardyń shákirtaqysy 15%-ǵa artqan.
Prezıdenttiń tapsyrmasy jáne Nur Otan partıasynyń saılaýaldy baǵdarlamasyn iske asyrý sheńberinde elimizdegi joǵary oqý oryndary stýdentteriniń, magıstranttary men doktoranttarynyń shákirtaqy kólemi osy jyldyń 1 qyrkúıeginen bastap arta tústi, dep habarlaıdy Almaty-akshamy.kz
«Bakalavrda oqıtyn stýdentterdiń shákirtaqysy 26 186 teńgeden 31 423 teńgege deıin artty. Pedagogıkalyq baǵyt boıynsha oqıtyn joo stýdentteri buryn 42 000 teńge alsa, endi 50 400 teńge alatyn bolady. Biz Prezıdenttiń tapsyrmasyn oryndap, bolashaq dárigerlerdiń stıpendıasyn edáýir arttyrdyq. Olar 26 186 teńgeniń ornyna 50 400 teńge alatyn bolady. Ótken jyldyń qańtar aıynda Memleket basshysynyń tapsyrmasy boıynsha shákirtaqy 25%-ǵa ulǵaıtyldy. Shyn máninde, sońǵy eki jylda bakalavrıatta oqıtyn stýdentterdiń stıpendıasy shamamen 2 ese artty», — dedi bilim jáne ǵylym vıse-mınıstri Qýanysh Erǵalıev.
Sonymen qatar magıstranttar, doktoranttar men ınternderdiń de shákirtaqylary artty. Eger buryn magıstranttar 66 913 teńge alsa, endi olardyń aı saıynǵy stıpendıasy 76 950 teńgeni quraıdy. Doktoranttar stıpendıasy 150 000 teńgeden 172 500 teńgege deıin, ınternderde – 47 431 teńgeden 59 289 teńgege deıin ósti.