Shahmat oıyndarynyń ýaqytyn baqylaý máselesi oıynnyń tanymaldylyǵynyń artýymen barǵan saıyn mańyzdy bola tústi. XIX ǵasyrdyń ortasyna deıin shahmat partıalary ýaqytpen shektelmegendikten, oıyndar saǵattap, tipti táýliktep sozylatyn. 1843 jyly 66 júris jasaǵan bir partıa 14,5 saǵatqa sozylǵan. Al 1851 jyly Londonda ótken alǵashqy halyqaralyq machta bir partıa barysynda eki qarsylas ta uıyqtap qalǵan, dep habarlaıdy aqshamnews.kz.
Ýaqytty baqylaý úshin birneshe áreketter jasaldy. Oıynshylardyń jalpy ýaqytyn 3 saǵatpen shekteý, árbir júriske 10 mınýt berý jáne ony asyp ketken jaǵdaıda aıyppul salý usynyldy. Bastapqyda ýaqytty baqylaý úshin qumsaǵattar qoldanyldy, al oıynshylarda kómekshiler boldy.
XIX ǵasyrdyń sońynda shahmatshy áýesqoı Tomas Braıt Ýılson alǵashqy shahmat saǵatyn jasady. Bul maıatnıkti mehanızm edi: eki birdeı saǵat relske bekitilgen. Ýaqytty qarsylasqa berý úshin oıynshy óz saǵatyn eńkeıtýi kerek bolatyn, sol kezde onyń saǵaty toqtap, qarsylasynyń saǵaty jumys isteı bastaıtyn.
Qyzyǵy, bul ónertabysqa ónerkásiptik óndiris boıynsha patentti Amandus Schierwater alǵan, jáne 1886 jyly saǵattar satylymǵa shyǵaryldy.
1899 jyly sıferblatta qyzyl tústi "jalaý" paıda boldy, ol sońǵy 3-10 mınýtty kórsetip turdy. Al 1900 jyly túımeli saǵattar jasaldy, olar klasıkalyq túrge aınaldy. Keıin elektr qýatynyń paıda bolýymen saǵattar jetildirildi, biraq olardyń negizi áli kúnge deıin Tomas Ýılsonnyń klasıkasyna súıenedi.