Qaladaǵy 207 jalpy bilim berý mekemesi beınebaqylaý júıesimen jabdyqtalǵan.
Almaty polıseıleri qaladaǵy barlyq mektepke beınekamera ornatylatynyn aıtty, dep habarlaıdy Almaty-akshamy.kz QazAqparatqa silteme jasap.
Almatyda qalalyq polısıa departamentiniń bastyǵy Arystanǵanı Zapparovtyń tóraǵalyǵymen jıyn ótti. Keńes barysynda polıseıler mektep oqýshylarynyń qaýipsizdigin talqylady.
Arystanǵanı Zapparovtyń aıtýynsha, Almatydaǵy barlyq 207 jalpy bilim berý mekemesi beınebaqylaý júıesimen jabdyqtalǵan.
«Mektep oqýshylarynyń qaýipsizdigi bilim berý mekemeleri ákimshiliginiń basty mindeti ekendigi sózsiz, biraq biz de shette qalmaýymyz kerek. Balalardyń qaýipsizdigin qamtamasyz etý mańyzdy baǵyttardyń biri ekendigin jáne osy baǵytta jumys isteýimiz qajettigin atap ótkim keledi. Qalada 207 jalpy bilim berý mekemesi bar, olardyń barlyǵy beınebaqylaý júıesimen jabdyqtalǵan, ıaǵnı 4 960 beınekamera ornatyldy. Árıne, mektepterde beınebaqylaý kameralarynyń bolýy quqyq buzýshylyqtyń aldyn alýǵa oń áserin tıgizedi, al olardyń Jedel basqarý ortalyǵyna qosylýy zańsyz sıpattaǵy túrli kórinisterge jedel den qoıýǵa múmkindik beredi», – dedi Arystanǵanı Zapparov.
Sonymen qatar, ol mektepterdiń terorıstik turǵydan osal uıymdardyń tizimine engizilgenin eske saldy. Sondyqtan bilim mekemelerin tájirıbesi de, materıaldyq resýrstary da bar, qyzmetkerlerdi oqytýǵa qatań talaptar qoıatyn kúzet kompanıalary qorǵaýy kerek.
«Abyroı bolǵanda, byltyrǵy oqý jylynda mektepterde eshqandaı quqyqbuzýshylyq bolǵan joq. Mektep oqýshylary arasyndaǵy qylmys deńgeıiniń tómendeý tendensıasyn jalǵastyrý úshin, esepte turǵan qıyn jasóspirimdermen jáne olardyń ata-analarymen maqsatty jumysty jalǵastyrý qajet. Quqyqbuzýshylyq pen óz-ózine qol jumsaýǵa beıim jasóspirimderdi anyqtaý, qajetti mamandardy tarta otyryp, olarmen jeke profılaktıkalyq jumystardy júrgizý jumystaryn jalǵastyrý. Taǵy bir aıta keterligi, oqý jylynyń bastalý qarsańynda mektepter mańynda kólik qozǵalysy qıyndaıdy. 31 myńnan astam búldirshin birinshi synypqa barady. Biz olardyń qaýipsizdigin tıisti deńgeıde qamtamasyz etý úshin bar kúsh-jigerimizdi salýymyz kerek», – dedi ol.
Aıta keteıik, Almaty polısıasy jazǵy demalys kezinde «Demalys», «Jasóspirim» jáne «Túngi qaladaǵy balalar» atty úsh aýqymdy is-shara júrgizdi, nátıjesinde kámeletke tolmaǵandardyń úılerinen tys jerde júrýiniń 2 myńnan astam deregi anyqtaldy.