Bul baǵdarlama sharty boıynsha 20 jylǵa deıin kredıt beriledi
«Báıterek» holdıńiniń enshiles uıymy «Otbasy bank» AQ damý áleýeti tómen monoqalalardyń turǵyndary úshin jeńildetilgen ıpoteka baǵdarlamasyn ázirleýde, dep habarlaıdy Almaty-akshamy.kz Elorda.info-ǵa silteme jasap.
Bul týraly Úkimeti otyrysynda holdıń basqarmasynyń tóraǵasy Aıdar Áriphanov aıtty.
Onyń aıtýynsha, bul ıpotekanyń sharttary mynadaı: bastapqy jarna - 10%, syıaqy mólsherlemesi 5%-ǵa deıin, kredıt merzimi - 20 jylǵa deıin.
«Qazirgi ýaqytta baǵdarlamanyń negizgi parametrlerin memlekettik organdarmen kelisýdemiz. Aldyn ala esepteýler boıynsha, bul maqsattarǵa 2022-2025 jyldary respýblıkalyq búdjetten jyl saıyn shamamen 11 mlrd teńge bólý qajet. Ónim 2022 jyldyń birinshi toqsanynda iske qosylmaqshy», - dep túsindirdi Aıdar Áriphanov.
«Báıterek» holdıńiniń basshysy oblıgasıalardy satyp alý tetigi arqyly kredıttik turǵyn úı qurylysy baǵyty boıynsha ótken jyly ákimdikterge jalpy somasy 163,7 mlrd teńge qorlandyrý, ıaǵnı bekitilgen jospardyń 100%-y berilgenin habarlady.
"Turǵyn úı qurylys jınaqtary" júıesi boıynsha 2021 jyly halyqqa jalpy somasy 1,235 trln teńgege 82,2 myń jeńildikpen qaryz berildi. "Otbasy bank" júıesinde 1,5 trln teńge bolatyn 2,2 mln shart bar.
Úlestik turǵyn úı qurylysy boıynsha jalpy somasy 372 mlrd teńge jáne aýdany 2 mln sharshy metr bolatyn 70 joba kepildendirildi.
Sondaı-aq, jeke qurylys salýshylardyń kredıtterin sýbsıdıalaý boıynsha jobalar jalpy somasy 27,8 mlrd teńgege maquldandy (bul 275 myń sharshy metr turǵyn úı), al jospar boıynsha 20 mlrd teńge bolǵan.