Qazaqstan ekonomıkasyn damytý jolynda ózine jaýapkershilik ala alatyn kásipkerlerdiń «jańa tolqyny» qajet. Bul týraly VIII saılanǵan QR Parlamentiniń birinshi sesıasynyń otyrysynda Memleket basshysy Qasym-Jomart Toqaev aıtty, -dep habarlaıdy Almaty-akshamy.kz QazAqparat-qa silteme jasap.
«Shaǵyn jáne orta kásipkerlik ekonomıka men eńbek naryǵynyń qozǵaýshy kúshine aınalýǵa tıis. Bul jóninde kóp aıtyldy. Biraq atalǵan baǵytta aıtarlyqtaı ilgerileý bolǵan joq. Demek, ekonomıkalyq saıasatqa ózgeris engizý qajet. Shaǵyn jáne orta bıznesti tolyqqandy qoldaý úshin keshendi sharalar qabyldaý kerek. Olar elimizdi damytýda mańyzdy ról atqaratynyn tolyq sezinýge tıis. Bizge Qazaqstan ekonomıkasyn damytý jolynda ózine jaýapkershilik ala alatyn kásipkerlerdiń «jańa tolqyny» qajet. Onyń bel ortasynda ákimshilik resýrstarǵa ıek artpaı, kásipkerlik talanty men eńbekqorlyǵynyń arqasynda kásibin tabysty júrgize alǵan bıznesmender bolýǵa tıis», - dedi Qasym-Jomart Toqaev.
Osy oraıda Prezıdent ondaı adamdar ár aımaqta bar ekenin aıtty.
«Olarǵa elimizde óz bıznesin damytýǵa múmkindik berý jáne naqty kómek kórsetý mańyzdy. Qazaqstannyń qazirgi ekonomıkalyq modeli, eń aldymen, shıkizat sektoryna ınvestısıa tartýǵa negizdeledi. Sondyqtan ulttyq býrjýazıanyń negizin quraıtyn orta bıznes júıesiz damyp jatyr. Tek jekelegen aımaqtarda ǵana oń qarqyn baıqalady. Jalpy, Úkimetke ekonomıkanyń negizgi salalaryna qomaqty ınvestısıa, sonyń ishinde sheteldik ınvestorlardy tartý mindeti júkteledi. Olar orta bıznestiń damýyna tyń serpin berýge tıis. Bul máseleni sozbalańǵa salýǵa bolmaıdy», - dedi Memleket basshysy.