Memleket basshysy Básekelestikti qorǵaý jáne damytý agenttiginiń tóraǵasy Serik Jumanǵarındi qabyldady
Prezıdentke Agenttiktiń turǵyn úı, qurylys materıaldary, áleýmettik mańyzy bar azyq-túlik ónimderi jáne janar-jaǵarmaı naryqtaryndaǵy baǵalardy turaqtandyrý jónindegi jumystary týraly esep berildi, dep habarlaıdy almaty-akshamy.kz
Agenttik tóraǵasynyń aıtýynsha, atalǵan salalar boıynsha monopolıaǵa qarsy qabyldanǵan sharalardyń nátıjesinde birqatar iri qurylys kompanıalary bastapqy turǵyn úı baǵasyn maýsym-tamyz aılarynda orta eseppen 7-20 paıyzǵa tómendetken, qurylys materıaldary baǵasynyń ósýi sáýir aıyndaǵy 10,9 paıyzdan tamyz aıynda 3,2 paıyzǵa deıin, benzın baǵasy sáýir aıyndaǵy 8,4 paıyzdan mamyr aıynda 0,2 paıyzǵa deıin arzandaǵan. Qazir de osy baǵalar saqtalyp otyr.
Áleýmettik mańyzy bar azyq-túlik ónimderi baǵasynyń apta saıynǵy qymbattaý kórsetkishi sáýir aıyndaǵy 0,6 paıyzdan, 14 qyrkúıektegi málimet boıynsha, 0,1 paıyzǵa deıin azaıǵan.
Memleket basshysyna taýar bırjalaryndaǵy komýnaldyq-turmystyq kómir saýdasynyń barysy týraly baıandaldy. Onda jergilikti operatorlar otyndy shaǵyn partıalarmen tikeleı satyp alýǵa múmkindik alady.
Qasym-Jomart Toqaevqa Agenttiktiń dárilik zattardyń baǵasyn qaıta retteý, radıojıilikterdi aýksıonǵa shyǵarý arqyly mobıldi baılanys naryǵynda básekelestik qalyptastyrýǵa jaǵdaı jasaý, jolaýshylar tasymaly 2 mıllıon adamnan asatyn áýejaılardaǵy jerde qyzmet kórsetý túrlerine táýelsiz tasymaldaýshylardyń qol jetkizýin qamtamasyz etý, sondaı-aq farmasevtıka, jol qurylysy, medısına salalarynda júrgizip jatqan monopolıaǵa qarsy baqylaý sharalary týraly málimet berildi.
Sonymen qatar Serik Jumanǵarın Memleket basshysyna Agenttiktiń kedergiler jónindegi keńes alańdarynda básekelestikti damytýǵa qatysty shekteýlerdi joıý qyzmeti, básekelestik máseleleri jónindegi zań jobasy, básekelestikti damytý tujyrymdamasynyń ázirlemesi, Ekonomıkalyq yntymaqtastyq jáne damý uıymyna múshe elderdegi básekelestikti damytýdyń sońǵy úrdisteri týraly aıtty.
Kezdesý sońynda Memleket basshysy áleýmettik azyq-túlik pen taýarlardyń baǵasyn baqylaýda ustaýdy tapsyrdy.