Aqyldy beınebaqylaý júıesi qıylystyń aldynda durys emes qatarǵa turýdy, stop-syzyǵyna kirýdi jáne avtobýs jolaǵynyń boıymen júrýdi anyqtaıdy.
«Sergektiń» qandaı zań buzýshylyqtardy tirkeıtini týraly Almaty polısıasy aıtty, dep habarlaıdy Almaty-akshamy.kz Polisia.kz saıtyna silteme jasap.
Sondaı-aq «Sergek» kameralary jyldamdyqty, kóliktiń baǵdarshamnyń qyzyl túsine ótip ketýin jáne durys emes jerge toqtaǵanyn anyqtaıdy.
«Barlyq buzýshylyqtardy polısıa óńdeıdi jáne jibermes buryn qyzmetkerdiń ESQ qoly qoıylady. Ári qaraı buzýshylyqtar týraly nusqaýlyq kólik quraldarynyń ıelerine eki jolmen jiberiledi: SMS jáne poshta. Aıyppul týraly habarlamany alǵannan keıin, quqyq buzýshy jeti kún ishinde somanyń jartysyn tóleı alady. Tólem óz erkimen tólenbegen jaǵdaıda, habarlama alynǵan kúnnen bastap 30 kún ótken soń, materıal QR ÁQbK-niń 894-babyna sáıkes májbúrlep alýǵa jiberiledi. Siz Egov.Kz jáne Qamqor.gov.kz saıttarynda buzýshylyq hattamasymen jáne tártibimen tanysa alasyz. Aıyppuldardy ózińizge unaıtyn yńǵaıly jolmen tóleýge bolady. Mysaly, elektrondy úkimet portalynda onlaın, bankterdiń esep aıyrysý-kassalyq bóliminde, mobıldi qosymshalar arqyly (Kaspi.kz, HalykBank, Kassa24, Handypay, Homebank, Kazpochta, Kolesa). Quqyq buzýshylyq úshin barlyq qarajat qalalyq búdjetke túsedi», – dedi ákimshilik polısıa basqarmasynyń bastyǵy Nurlan Amanbek.