Shveısarıanyń Davos qalasynda «Senimdi qalpyna keltirý» atty dúnıejúzilik ekonomıkalyq forým ótýde
Ulttyq ekonomıka mınıstri Davostaǵy Dúnıejúzilik ekonomıkalyq forým aıasynda birqatar ekijaqty kezdesýler ótkizdi. Atap aıtqanda, Álibek Qýantyrov Carlsberg group-tyń Bas dırektory Iakob Aarýp-Andersenmen, «Vestas Wind Systems A. S.» aǵa Vıse-prezıdenti Morten Dırholmmen jáne «Schneider Electric» international Operations kompanıasynyń óńir boıynsha atqarýshy Vıse-prezıdenti Manısh Pantpen kezdesti.
Kezdesý barysynda taraptar saýda-ekonomıkalyq jáne ınvestısıalyq yntymaqtastyq máseleleri jóninde ózara pikir almasty. UEM basshysy ınvestısıalardy qoldaý men qorǵaýdyń tıimdi quraldary týraly aıtyp berdi, dep habarlaıdy almaty-akshamy.kz.
«Vestas Wind Systems A. S.» aǵa Vıse-prezıdenti jáne Schneider Electric kompanıasynyń atqarýshy Vıse-prezıdentimen áńgime barysynda jańartylatyn energıa kózderin damytý, energetıkalyq qaýipsizdikti qamtamasyz etý máseleleri talqylandy. Buǵan qosa, Qazaqstanda óndiristi oqshaýlaý jaıly sóz qozǵaldy.
Sondaı-aq, QR-daǵy ınvestorlarǵa qatysty qabyldanatyn salyq salý máseleleri talqylandy. Óz kezeginde Carlsberg group-tyń Bas dırektory elimizde júrgizilip jatqan salyq saıasatyna, onyń ishinde alkogóldik ishimdikterdi aksızdeý jumystaryna oń baǵa berdi.
Osy kúnderi Shveısarıanyń Davos qalasynda Dúnıejúzilik ekonomıkalyq forým ótýde. Ekonomıka men saıasattyń jahandyq máseleleri talqylanyp jatqan is-sharanyń taqyryby – «Senimdi qalpyna keltirý».
Bul a.j. 19 qańtaryna deıin jalǵasatyn jyl saıynǵy dástúrli 54-shi kezdesý. Halyqaralyq forým jumysyna memleket pen úkimet basshylary, mınıstrler, sarapshylar jáne qoǵam qaıratkerleri qatysýda.