Senattyń Áleýmettik-mádenı damý jáne ǵylym komıtetiniń depýtattary keńeıtilgen otyrysta «Qazaqstan Respýblıkasynyń keıbir zańnamalyq aktilerine oıyn bıznesi, lotereıa qyzmeti, densaýlyq saqtaý, memlekettik eńbek ınspeksıasy, memlekettik baqylaý jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» jáne «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zańdardy talqylady, dep habarlaıdy Almaty-akshamy.kz.
Bul týraly Senattyń baspasóz qyzmeti málimdedi.
Qujattar azamattardy qumar oıyndar men bás tigýge qatysý kezinde oıynǵa táýeldilikten qorǵaý jónindegi zańnamany jetildirýge baǵyttalǵan. Zańdarda qumar oıyndar men bás tigýge qatysatyn adamdardyń shekteýli tizimin aıqyndaý, qumar oıyndarǵa táýeldi adamdardy medısınalyq ońaltý tártibi belgilenedi jáne olardy konsýltasıalyq medısınalyq baıqaýdan ótkizý engiziledi, býkmekerlik keńseler men totalızatorlardy syrtqy jarnamada, atap aıtqanda: ǵımarattarda, kólik quraldarynda, buqaralyq aqparat quraldarynda, kınolarda, beınejazbalar men anyqtamalyq qyzmet kórsetý barysynda jarnamalaýǵa tyıym salynady.
Odan basqa, lotereıa bıletterin taratýǵa qoıylatyn talaptar belgilenedi jáne Qazaqstanda lısenzıasyz sheteldik býkmekerlik keńseler men totalızatorlardyń ınternet-resýrstarynyń qyzmetine tyıym salynady. Qumar oıyndar men bás tigýdiń qaýiptiligi men zıany týraly eskertýlerdi oıyn mekemelerinde, býkmekerlik keńselerde, totalızatorda, kazınoda, oıyn avtomaty zaldarynda, sondaı-aq ózderiniń ınternet-resýrstarynda ornalastyrý talaptaryn saqtamaǵany úshin oıyn bıznesin uıymdastyrýshylarǵa ákimshilik jaýapkershilik engizý kózdelip otyr.
Senatorlardyń aıtýynsha, zańdardy qabyldaý oıyn bıznesi, lotereıa jáne lotereıa qyzmeti salasyn retteýdiń normatıvtik negizin tujyrymdamalyq turǵyda qalyptastyrýǵa múmkindik beredi jáne ulttyq zańnamany jáne olardyń quqyq qoldaný tájirıbesin odan ári jetildirýge yqpal etedi.
Komıtet músheleri talqylaý qorytyndysy boıynsha zańdardy Palata otyrysynda qaraýǵa jiberý týraly sheshim qabyldady.