Senat spıkeri Máýlen Áshimbaevtyń tóraǵalyǵymen Inklúzıa jónindegi keńestiń kezekti otyrysy ótti.
Depýtattar memlekettik organdar men saraptamalyq qoǵamdastyq ókilderimen birlesip, erekshe qajettiligi bar adamdardyń sapaly bilim alý múmkindikterin keńeıtý jóninde usynystar almasyp, olardy iske asyrý joldaryn talqylady. Otyrys jumysyna Oqý-aǵartý mınıstri, Ǵylym jáne joǵary bilim, Densaýlyq saqtaý, Eńbek jáne halyqty áleýmettik qorǵaý vıse-mınıstrleri, halyqaralyq uıymdardyń ókilderi qatysty, dep habarlaıdy aqshamnews.kz.
Oqý-aǵartý mınıstri Ǵanı Beısembaev ınklúzıvti bilim berýdi damytý boıynsha qabyldanyp jatqan sharalarǵa toqtalyp, bilim berý múmkindikterin keńeıtý boıynsha bastamalar men usynystaryn jetkizdi. Búgingi tańda qazaqstandyq mektepterde erekshe bilim berý qajettilikteri bar balalar úshin kedergisiz orta qurylýda. Osylaısha, mektepterdiń 88%-y ınklúzıvti bilim alýǵa jaǵdaı jasady. 2024 jyly 5 myńnan astam pedagog qaıta daıarlaý kýrstarynan ótti.
Senat spıkeri Máýlen Áshimbaev teń múmkindikti ınklúzıvti qoǵam qalyptastyrý el Prezıdentiniń reformalarynyń kún tártibindegi mańyzdy basymdyqtardyń biri ekenin atap ótti. Bul baǵytta sońǵy jyldary júıeli jumystar júrgizilýde jáne kóptegen salalarda, sonyń ishinde oqý-aǵartý júıesinde oń dınamıka baıqalady.
Senat spıkeri ınklúzıvti bilim berýdi damytý jónindegi jumysty kúsheıtý qajettiligin atap ótti. Erekshe qajettiligi bar adamdardyń bilim alý múmkindikterin keńeıtý jónindegi ázirlengen usynystar múddeli taraptardyń birlesken jumysy úshin tıisti memlekettik organdarǵa joldanatyn bolady.