Áýezov jáne Túrksib aýdandaryndaǵy kóp qabatty turǵyn úılerdiń aýlalarynda tazalyqty qamtamasyz etetin merdigerler anyqtalyp, aýla tazalaýdy qolǵa aldy. Qala ákimi Erbolat Dosaevtyń ókimimen bıyl aýlalardy tazartýǵa búdjetten qarjy bólingen bolatyn.
Jaıyq ALTAIULY, Áýezov aýdany ákimi apparatynyń komýnaldyq sharýashylyq bóliminiń bas mamany:
- Qala ákiminiń tapsyrmasymen 1 qańtardan bastap aýla aýmaǵyn tazalaý jumystary júrgizilýde. Áýezov aýdany boıynsha 10 merdiger kompanıa jumys isteıdi. Turǵyndar tarapynan qoqys jáshikteri men aýla aýmaǵyndaǵy balalar oınaıtyn alańdy tazalaý jóninde aryz-shaǵymdar bar. Sol boıynsha tıisti sharalar qabyldanýda. Kire beris, jaıaý júrginshi joldary, qoqys jáshikteri tazalanady. Jumys barysy tańerteń saǵat 8-den keshki saǵat 17.00-ge deıin kúndelikti júrgiziledi. Aýdan boıynsha 500-den astam jumysshy, 47 tehnıka bar. «Saıran», «Tastaq» yqshamaýdandaryndaǵy 16 aýla tazalanýda. Odan bólek, qar jaýǵanda mobıldik top jumys isteıtin bolady», - deıdi merdiger uıymnyń basshysy Rýslan Jarasbaev.
Aıdos BEKETAEV, Túrksib aýdany ákiminiń orynbasary:
- Almaty qalasy ákiminiń tapsyrmasymen aýlalardy tazalaýǵa búdjetten qarjy bólingen bolatyn. Qazirgi tańda Túrksib aýdanynda 594 aýla bar. Osy aýlalarǵa barlyǵy 36 merdiger kompanıa qyzmet kórsetedi. Dál qazir Túrksib aýdanyndaǵy «Altaı» yqshamaýdany, Maılın kóshesi, 71 aýla aýmaǵyna «Stroı servıs» kompanıasynyń 34 jumysshysy jáne tehnıkalar jumyldyryldy. Olar aýladaǵy muzdy oıyp, qardy tazalaıdy, trotýarlardy qardan tazartyp, qoqystardan aryltady, balalardyń oıyn alańy da retke keltiriledi. Biz barynsha aýla tazalaýshy jumysshylardyń bárin jumyspen qamtýǵa, jumyssyz qaldyrmaýǵa tyrysamyz. Olar árkim óz jaǵdaıyna baılanysty keıbiri tolyq jumys kúnine kelisedi, keıbiri densaýlyǵyna, otbasylyq jaǵdaıyna baılanysty tolyq emes jumys kúnin tańdaıdy. Jumysshylardyń arasynda zeınet jasyndaǵy adamdar da bar. Árkimniń eńbegine qaraı, jumys kólemine qaraı jalaqysy tólenedi.
Jaına BAIKESHOVA, Túrksib aýdanynyń turǵyny:
-Túrksib aýdanynyń ákimine, ákimniń orynbasarlaryna, Turǵyn úı sharýashylyǵy bóliminiń qyzmetkerlerine alǵysymyzdy bildiremiz. Aýlamyz únemi ýaqytynda tazalanady. Aýla tazalaýshylar aı saıyn kelip qardy tazalap, joldardy ashyp ketedi. Bıyl qar mol tústi. Aýlamyz kóleńke jaq bolǵandyqtan kóshelerge jıi muz qatyp, balalardyń, qart adamdardyń júrýine qıyndyq týǵyzatyny ras. Al ákimdiktiń jumysshylary demalys, mereke kúnderine qaramastan óz jumystaryna jaýapkershilikpen qaraıdy, árdaıym kelip aýlany tazartyp otyrady. Sol úshin barsha turǵyndardyń atynan ákimshilikke rızashylyǵymyzdy bildiremiz.
