Onyń aıtýynsha, áıelderge belgilengen zeınet jasy jastar arasyndaǵy jumyssyzdyq deńgeıine de áser etedi.
Dana Nurjigit áıelderdiń zeınetke shyǵý jasyn 58 jasqa deıin tómendetýdi usyndy, dep habarlaıdy Almaty-akshamy.kz
Ol Premer-Mınıstr Álıhan Smaıylovtyń atyna joldaǵan depýtattyq saýalynda 2015 jyly áıelderdiń zeınetkerlik jasyn ulǵaıtý týraly sheshim Qazaqstanda 71 jasty quraıtyn ortasha ómir súrý uzaqtyǵyn eskere otyryp qabyldanǵanyn eske saldy. 2021 jyly bul kórsetkish 70 jasqa deıin tómendedi. Sonymen qatar, 2020 jyly pandemıaǵa baılanysty elimizde ólim-jitim 22%-ǵa ósti.
Dana Nurjigittiń paıymdaýynsha, BUU boljamdaryna súıenip jasalǵan 2015 jylǵy zeınetaqy reformasy aıasynda 2022 jyly Qazaqstanda ómir súrý uzaqtyǵy áıelder úshin 78 jasty jáne erler úshin 70 jasty quraıdy degen kórsetkish naqty jaǵdaıǵa saı kelmeıdi. Onyń aıtýynsha, áıelderge belgilengen zeınet jasy jastar arasyndaǵy jumyssyzdyq deńgeıine de áser etedi.
«Búgingi zeınetaqy zańyna sáıkes, azamattar jumys oryndaryn bosatpaı, 60-63 jasqa deıin otyra beretin bolsa, artynan kele jatqan jańa býynǵa jumys joq degen sóz. Sońǵy kezderi Úkimettiń zeınetaqy salasyna nazar aýdaryp, aýyr mamandyq ıeleriniń zeınetke shyǵý jasyn qaıta qaraýdy qolǵa alyp jatqanyn bilemiz. Osyǵan baılanysty, azamattardyń senatorlarǵa joldaǵan kóptegen ótinishterin eskere otyryp, áıelderdiń 58 jasta zeınetke shyǵý jasyn belgileýdi, al eńbegin odan ári jalǵastyrý máselesin óz erkine qaldyrýdy usynamyz», - dedi Dana Nurjigit.