Parlament Senatynyń Tóraǵasy Máýlen Áshimbaev bastaǵan AES salýdy qoldaý jónindegi halyq shtaby Abaı oblysyna bardy, dep habarlaıdy aqshamnews.kz
Shtab quramynda depýtattar, sarapshylar jáne belsendi azamattar bar. Olar referendýmǵa oraı aqparattyq-túsindirý jumystary aıasynda aýylsharýashylyq ónimderin óndirýshilermen, bilim berý salasynyń mamandarymen jáne komýnaldyq qyzmetter salasyndaǵy eńbek ujymdarymen kezdesti.
Bilim berý salasynyń qyzmetkerlerimen ótken kezdesýde Máýlen Áshimbaev AES salý máselesine keshendi kózqaras qajet ekenin atap ótti. Ol jańa tehnologıalardy zerttep, óndiriske ınovasıalardy engizýdiń mańyzdylyǵyna nazar aýdardy. Sonymen qatar, Senat Tóraǵasy durys sheshim qabyldaýǵa kedergi keltiretin eski stereotıpter men qaǵıdalar týraly da aıtty.
«AES-tiń qaýipsizdigi kópshilikti alańdatyp otyrǵany belgili. Mundaı alańdaýshylyq negizinen ótken ǵasyrdaǵy ıadrolyq synaqtar men apattardyń saldarynan týyndaǵany túsinikti. Alaıda qazirgi atom stansalary senimdi, eń ozyq jáne tekserilgen tehnologıalarmen salynyp jatyr. Bul III jáne III+ býyndar týraly sóz. Eger halyq referendýmda AES salýdy qoldasa, elimizde atom elektr stansıasy eń joǵary halyqaralyq standarttarǵa saı salynyp, tolyq qaýipsizdik qamtamasyz etiledi. Jobanyń qaýipsizdigi MAGATE men basqa da halyqaralyq uıymdardyń qadaǵalaýynda bolady», – dedi Áshimbaev.