Senat Spıkeri Máýlen Áshimbaevtyń tóraǵalyǵymen Palata otyrysy ótti. Onda senatorlar medıa salasyna jáne jańartylatyn energıaǵa qatysty zańdardy, sondaı-aq, balyq aýlaý sýbsıdıalary jónindegi kelisimdi qarady.
Otyrys barysynda senatorlar «Mass-medıa týraly» zańdy jáne oǵan ilespe «Qazaqstan Respýblıkasynyń keıbir zańnamalyq aktilerine mass-medıa máseleleri boıynsha ózgerister men tolyqtyrýlar engizý týraly», «Qazaqstan Respýblıkasynyń Ákimshilik quqyq buzýshylyq týraly kodeksine mass-medıa máseleleri boıynsha ózgerister engizý týraly» zańdardy qarap, maquldady, dep habarlaıdy Almaty-akshamy.kz.
Palata Tóraǵasy atap ótkendeı, bul zańdar mass-medıa salasyndaǵy zańnamany júıeli túrde jetildirýdi kózdeıdi. Negizgi zań arqyly mass-medıa qyzmetiniń maqsattary, qaǵıdattary men mindetteri bekitildi.
«Oqıǵalardy obektıvti túrde jarıalaý jáne taratylatyn aqparattyń anyqtyǵy zańda kórsetilgen negizgi qaǵıdattardyń biri. Jańa normalar arqyly BAQ qyzmetin uıymdastyrý sharttary, jýrnalıserdiń kepildikteri, olardyń azamattarmen jáne uıymdarmen ózara qarym-qatynasynyń negizderi de retteldi. Memlekettik tildiń mártebesin nyǵaıtý maqsatymen otandyq kontentti damytýǵa arnalǵan erejeler de qarastyrylǵan. Balalar men múgedektigi bar adamdardyń quqyqtaryn qosymsha qorǵaýǵa arnalǵan normalar da bar. Prezıdentimiz Qasym-Jomart Kemeluly Toqaev atap ótkendeı, memleket, medıa jáne qoǵam arasyndaǵy kelisim Ádiletti Qazaqstannyń berik irgetasyna aınalýǵa tıis. Osy rette maquldanǵan zańdar barlyq múddeli taraptyń pikirin eskeretin sapaly jańa quqyqtyq model qalyptastyrady dep senemiz», – dedi Máýlen Áshimbaev.
Usynylǵan jańa normalardyń qatarynda qarjylandyrý tetikterine, buqaralyq aqparat quraldarynyń materıaldaryna qoıylatyn eskirý merzimderin belgileýge, BAQ suraýlaryn qaraý merzimderin qysqartýǵa jáne taǵy basqa máselelerge qatysty novelalar bar.
Sonymen qatar Senat otyrysynda «Qazaqstan Respýblıkasynyń keıbir zańnamalyq aktilerine jańartylatyn energıa kózderin paıdalanýdy qoldaý jáne elektr energetıkasy máseleleri boıynsha ózgerister men tolyqtyrýlar engizý týraly» zań qaralyp, maquldandy. Bul zań osy baǵyttaǵy qoldanystaǵy zańnamany jetildirýge, jańartylatyn energıa kózderin paıdalaný kólemin odan ári ulǵaıtýǵa, sondaı-aq, elektr energetıkasy salasyn qosymsha qoldaýǵa baǵyttalǵan. Osyǵan baılanysty zańda jańartylatyn energıa tehnologıalaryn paıdalanýdy yntalandyrý jáne óńirlik elektr jelilerin damytý úshin birqatar quqyqtyq tetikteri qarastyrylǵan.
Sondaı-aq depýtattar «Dúnıejúzilik saýda uıymyn qurý týraly Marrakesh kelisimine ózgerister engizý týraly hattamany (Balyq aýlaý sýbsıdıalary jónindegi kelisim) ratıfıkasıalaý týraly» zańdy da qarap, maquldady. Qujat zańsyz, habarlanbaıtyn jáne rettelmeıtin balyq aýlaýǵa yqpal etetin sýbsıdıa berýdi shekteý arqyly balyq resýrstarynyń saqtalýyn qamtamasyz etýge arnalǵan. Otyrysta atap ótilgendeı, DSU-nyń barlyq múshesi úshin mindetti Hattamanyń qabyldanýy kópjaqty saýda baılanysy bar el retinde Qazaqstannyń ımıjine oń áserin tıgizedi.
Palata otyrysynda senatorlar depýtattyq saýaldaryn da joldady.
Andreı Lýkın Úkimetti saqtandyrý kompanıalarynyń qyzmetine baqylaýdy kúsheıtýge shaqyrdy. Depýtattyń aıtýynsha, qazirgi eń tómengi saqtandyrý mólsherlemesi jumys berýshiler úshin, ásirese, aýyldyq jerlerde qarjylyq aýyrtpalyq týdyryp otyr.
Murat Qadyrbek Kentaý qalasynyń ekologıalyq problemalaryna toqtaldy. Ol ekologıalyq qaýipti aımaqtarda turatyn azamattarǵa ústemaqy tóleý máselesin kóterdi.
Altynbek Nýhuly mektep oqýshylaryna arnalǵan bilim berý baǵdarlamasynyń júktemesi shamadan tys ekenin aıtyp, alańdaýshylyq bildirdi. Depýtattyń pikirinshe, Orta bilim berý sapasyn arttyrý tujyrymdamasyna osy baǵyttaǵy halyqaralyq tájirıbeni eskere otyryp ózgerister engizý kerek.
Nýrıa Nıazova Almaty oblysy Eńbekshiqazaq aýdanyndaǵy kópsalaly aýrýhananyń ózekti problemalaryna Úkimettiń nazaryn aýdardy. Atalǵan nysan angıografıalyq júıe ornatýdy qajet etedi. Bul jabdyq qan aınalymy júıesiniń aýrýlaryn sapaly emdeý jáne ınsýlt saldarynan bolatyn ólimdi azaıtý úshin kerek.
Arman Óteǵulov óz saýalynda otandyq temirjol salasyndaǵy negizgi problemalarǵa, onyń ishinde ınfraqurylymnyń tozýy, vagondardyń tapshylyǵy, prosesterdi avtomattandyrýdyń tómen deńgeıi, bıletterdiń jetispeýshiligi jáne olardyń joǵary quny sıaqty túıtkilderge toqtaldy.
Aınur Arǵynbekova radıofarmasevtıkalyq dárilik preparattardy tirkeý jáne lısenzıalaý prosesindegi shekteýler elimizde ıadrolyq medısınanyń damýyna kedergi keltiretinin tilge tıek etti. Osyǵan baılanysty senator prosedýrany jeńildetý úshin ulttyq normatıvterdi eýropalyq standarttarǵa beıimdeýdi usyndy.