Almaty qalasy ákimi janyndaǵy áıelder isi, otbasy jáne demografıalyq saıasat jónindegi komısıa músheleri de Halyqaralyq balalardy qorǵaý kúninde qaıyrymdylyq is-sharalarymen qalamyzdyń jas turǵyndaryn qýantty, dep habarlaıdy Almaty-akshamy.kz..
Qala ómirindegi qoǵamdyq isterge belsendi túrde atsalysyp, áleýmettik ahýalǵa kóbirek kóńil bóletin komısıa músheleri balalarǵa shýaqty sát syılaıtyn mereke kúni densaýlyqtaryna baılanysty ózderiniń zamandastarymen teń júrip, teń kúle almaıtyn damýlarynda kemshilikteri bar múmkindigi shekteýli balalarǵa merekelik kóńil-kúı syılady. Qalamyzdyń segiz aýdanynan jınalǵan 70-ke jýyq balalar men olardyń ata-analaryn «Juldyz» meıramhanasynda súıikti ertegileri men múltfılmderiniń keıipkerleri, jas ónerpazdar qarsy alyp, olardy bir sátke bolsa da qýanysh baǵyna jeteledi. Balalar án tyńdap, ertegi keıipkerlerimen syrlasyp, bıdiń tamasha áýenine eltip, kezeginde óz ónerlerin de ortaǵa salyp, zamandastarymen qaýyshyp, máz-meıram boldy.
Merekelik is -sharaǵa jınalǵan balalardy Almaty qalasy ákimi janyndaǵy áıelder isi, otbasy jáne demografıalyq saıasat jónindegi hatshysy Gúlnara Ámirova quttyqtap, qalamyzda múmkindigi shekteýli jandar úshin jasalyp jatqan qamqorlyqtarǵa, olardyń damýy men densaýlyǵyn jaqsartý barysynda atqarylyp jatqan sharalarǵa toqtalyp, osy ıgilikterdiń barlyǵy balalardyń baqyty úshin jasalyp jatqanyn, Almaty qalasynyń teń múmkindikter qalasy ekendigin atap ótti. Baýyr eti balalarynyń basyna túsken aýyrtpalyqty moıymaı arqalap júrgen ata -analarǵa alǵys aıtyp, tózimdilik tiledi.
Merekelik is shara barysynda balalarǵa olardyń damýyna septigi tıer oıynshyqtar, kitaptar, boıaý dápterler syıǵa tartyldy. Jaqsylyq pen meıirimdilikti ajyrata biletin bala kóńil «Juldyz» meıramhanasynyń basshysy Sáýle Súleımenova apaılary jaıǵan dámdi dastarhan men Sana Jandaı apaılary tańdap ákelgen syılyqtarǵa rızashylyqtaryn bildirdi. Ata-analar múmkindigi shekteýli balalaryn nazardan tys qaldyrmaı qýanysh syılaı bilgen komısıa múshelerine, osy sharaǵa demeýshilik jasaǵan « Juldyz», Almaty kilem, «ADANAS» JSHS, «Alataý» medıssınalyq-áleýmettik ortalyǵyna, «Gúlden saýda» jáne Qazaqstan medıa jelisi basshylaryna alǵystaryn bildirdi.