Jurtshylyq monýmentke gúl shoqtaryn qoıdy.
Semeıde ıadrolyq synaqtardyń qurbandary men Jambyl oblysyndaǵy jarylystan qaza tapqandardy bir mınýt únsizdikpen eske aldy, dep habarlaıdy Almaty-akshamy.kz SHQO ákimdiginiń baspasóz qyzmetine silteme jasap.
30 jyl buryn elimizdiń Tuńǵysh Prezıdenti Nursultan Nazarbaevtyń sheshimimen Semeı ıadrolyq synaq polıgony jabyldy. Bul 1949 jyldan bastap jumys istep kele jatqan KSRO kezindegi eń iri polıgondardyń biri edi. 1989 jylǵa deıin kemi 468 synaq jasalǵan. Synaq júrgizý barysynda jer betinde, jer astynda jáne aýada 616 ıadrolyq qurylǵy jarylǵan. Sońǵy jarylys 1989 jyly 19 tamyzda boldy. Sol kezde búkil álem boıynsha mıllıondaǵan synaq qurbandaryn biriktirgen «Nevada-Semeı» qozǵalysy quryldy.
Búgin Semeı qalasynda «Ólimnen de kúshti» monýmentinde mıtıń uıymdastyryldy. Onda qozǵalys belsendileri men jurtshylyq ókilderi monýmentke gúl shoqtaryn qoıyp, Jambyl oblysynyń Baızaq aýdanynda bolǵan jarylystan qaza tapqandar men ıadrolyq polıgonnyń qurbandaryn bir mınýt únsizdikpen eske aldy. Bul is-sharaǵa qatysqan Shyǵys Qazaqstan oblysynyń ákimi Danıal Ahmetov polıgondy jabý týraly sheshim – Elbasy jasaǵan teńdessiz qadam bolǵanyn jáne Jańa dáýir – «Beıbit atom» dáýiri bastalǵanyn aıtty.
Bul elimizdiń egemendigin aıqyndaıtyn jáne Táýelsizdigimizdiń qalyptasý kezeńiniń basyndaǵy mańyzdy sheshim boldy. Tarıhı jarlyq pen Semeıdegi ıadrolyq polıgonnyń jabylýy - El Táýelsizdigi jarıalanǵan tustaǵy eń mańyzdy oqıǵalardyń biri. Budan bylaı polıgonda jarylys bolmaıdy. Biraq ol jerde tıisti jumystar atqaryla beredi. Máselen, onda atom energıasyn beıbit maqsatta paıdalanýǵa múmkindik mol, - dedi SHQO ákimi.
Aımaq basshysy búginde jabyq polıgon bazasynda jumys isteıtin Kýrchatov qalasyndaǵy Ulttyq ıadrolyq ortalyqta múldem basqa sıpattaǵy zertteýler júrgizilip jatqanyn, ondaǵy ǵalymdar áskerı jáne qorǵanys ónerkásibine eshqandaı qatysy joq birqatar perspektıvaly jáne eń bastysy paıdaly jobany iske asyrǵanyn atap ótti.
Budan bólek 2008 jyly munda polıgonnyń lastanǵan ýchaskelerine adamdardyń, maldyń kirýine jol bermeý maqsatynda ınjenerlik qorǵaý qurylystaryn salý jumystary bastaldy.