Barlyq alańdarda jańa kásibı trenajerler ornatylǵan.
Semeıdegi jańartylǵan Beıbitshilik aralynda balalar temirjoly paıdalanýǵa berildi. Bul oblystaǵy týrızmdi damytýǵa yqpal etedi. Sonymen qatar, aralda jańa qoǵamdyq keńistik saltanatty túrde ashyldy, dep habarlaıdy aqshamnews.kz.
Qoǵamdyq keńistikte balalar oıyn alańdary, fýtbol, voleıbol, strıtbol alańdary men vorkaýt aımaǵy bar.
Balalar temirjoly 1979 jyly temirjolshylar kúnine oraı ashylǵan bolatyn. Alaıda, 90 jyldardyń ortasyna qaraı jabylǵan edi. Mine, 20 jyldan astam ýaqyttan keıin balalar temirjoly qaıta qalpyna keltirildi. 2023 jyldyń 5 maýsymynda oblys ákimi Nurlan Uranhaev Ortalyq komýnıkasıalar qyzmetiniń óńirdegi kóshpeli baspasóz konferensıasynda balalar temirjolyn jandandyrýdy josparlap otyrǵanyn aıtqan edi.
Temirjol araldyń ásem jerlerin aralap, jolaýshylarǵa Ertis ózeniniń erekshe tabıǵı landshafy men ádemi kórinisterin tamashalaýǵa múmkindik beredi.
Birinshi kezeńde temirjol uzyndyǵy 2 shaqyrym bolady. Araldaǵy kópirden bıologıalyq ortalyqqa deıingi aralyqta júredi. Teplovoz ben vagondar temirjol tehnıkasyna mamandanǵan Qambar mashına jasaý zaýytynda daıyndaldy. Uzyndyǵy 12 metr bolatyn ár vagonda 32 oryn bar. Eger, marshrýt suranysqa ıe bolsa, qosymsha vagondarǵa tapsyrys beriledi.
Balalar temirjoly tek oıyn-saýyq orny ǵana emes, jastardyń temirjol mamandyǵyna qyzyǵýshylyǵyn arttyrýǵa yqpal etetin mańyzdy bilim berý jobasy bolmaq. QTJ basshylyǵy qajetti personaldy oqytýǵa qoldaý kórsetýge daıyn. Sonymen qatar, temirjol mamandyǵyna baýlıtyn balalar úıirmesin qurý josparlanýda.