Abaı oblysynda úsh ýchaskede órt sóndirý jumystary áli jalǵasyp jatyr.
TJM Órtke qarsy qyzmet komıtetiniń tóraǵasy Nurbolat Derbisovtiń aıtýynsha, qazir jaǵdaı turaqtalyp keledi, dep habarlaıdy Almaty-akshamy.kz
"Tótenshe jaǵdaı mınıstri Iýrıı Ilınniń ókimine sáıkes búgin tańǵy saǵat 4-te órt ornyna Qaraǵandy men Almaty oblystarynan QR TJM 52859 jáne 28237 áskerı bólimderiniń áskerı qyzmetkerleri jiberildi. Qazirgi ýaqytta Abaı oblysynda 3 ýchaskede: Podnebesnoe, Ýspenka aýyldarynda, Kashtak ormanshylyǵynda órtti sóndirý jumystary jalǵasyp jatyr", - dep habarlady TJ mınıstrligi.
Aerovızýaldy tekseris júrgizilýde.
Sonymen qatar, órt ornyna qosymsha arnaıy baılanys quraldarymen jaraqtandyrylǵan jyljymaly basqarý pýnkti jiberildi. Basqarý organy ol jerden de tótenshe jaǵdaı aımaǵynda óz fýnksıalaryn júzege asyrady.
TJM Órtke qarsy qyzmet komıtetiniń tóraǵasy Nurbolat Derbisovtiń aıtýynsha, qazir jaǵdaı turaqtalyp keledi. Alaıda aptap ystyq pen jel órtti sóndirý jumystaryn qıyndatyp tur.
"Tańerteńnen bastap tikushaqpen órtti barlaý jumystary júrip jatyr. Tańǵy altydan 8 tikushaq órtti sóndirýge kirisip ketti. Odan bólek barlyq tehnıka men jeke quram jumyldyryldy", - dedi ol.
Tilsiz jaýmen kúreske qorǵanys mınıstrliginiń kúshteri de tartylǵan.