Búgin “Almaty – bizdiń ortaq úıimiz” ekologıalyq sharasy aıasynda Túrksib aýdanynda keń kólemdi senbilik ótti. Seıfýllın atyndaǵy saıabaq pen onyń mańaıyndaǵy gúlzarlar tazartylyp, abattandyrý jumystary júrgizildi. Senbilikke 200-den astam adam qatysyp, qalanyń tazalyǵyna óz úlesterin qosty.
Saıabaqta bul kúni apatty aǵashtar anyqtalyp, kóp jyldyq qylqan japyraqty kóshetter, shyrshalar otyrǵyzyldy. Saıabaqqa tıesili 9 gektar jer tazartylyp, qoqystar jınaldy. Mundaǵy oryndyqtar qalpyna keltirilip, qoqys jáshikteri jańartyldy. Tazalyq jumystaryna 5 arnaıy tehnıka jumyldyryldy.
Túrksib aýdany ákimi Baqytjan Aqjarov sharanyń mańyzdylyǵyn atap ótti:
- “Almaty – bizdiń ortaq úıimiz. Ony taza, kórikti ári jaıly qalaǵa aınaldyrý – árbirimizdiń mindetimiz. Búgin biz tek saıabaqty tazalap qana qoımaı, onyń jańarýyna da atsalysyp jatyrmyz. Barshańyzdy týǵan qalamyzdyń tazalyǵyna úles qosýǵa shaqyramyn!”
Bul ıgi bastamaǵa Qazaq memlekettik sırkiniń ártisteri de qoldaý kórsete kelipti.
- “Senbilik – tek tazalyq sharasy ǵana emes, týǵan jerge degen súıispenshiliktiń kórinisi. Tabıǵatty aıalaý, aınalamyzdy taza ustaý – bárimizdiń ortaq mindetimiz. Ár azamat qalamyzdyń kórkeıýine óz úlesin qosýy kerek!” – deıdi sırk ártisi Erkebulan Súleımenov.
Al “Nomad” kaskaderlik tobynyń múshesi Baqyt Kenjehan óz oıyn bulaısha jetkizdi:
- “Biz “Nomad” kaskaderlik tobynyń músheleri osy bastamaǵa qoldaý kórsetýge keldik. Bárimiz birge eńbek etip, qorshaǵan ortany tazartyp, tabıǵattyń jańarýyna úles qosyp jatyrmyz. Mundaı sharalar adamdardy jaqyndastyryp, ortaq maqsatqa biriktiredi. Qalamyzdy taza, kórikti etip saqtaıyq! Óıtkeni Almatynyń tazalyǵy bárimizge ortaq.”
Áp- sátte senbilikke qatysýshylar ózderi jınaǵan jerdiń tazarǵanyn kórip, qýanyp jatyr. Al sharany uıymdastyrýshylar mundaı tazalyq jumystarynyń áli de jalǵasa beretinin aıtady.
“Qalanyń tazalyǵy – onyń turǵyndarynyń mádenıetine de tikeleı qatysty” degen sóz bar. Bul bárimizge qatysty aıtylsa kerek.
Almatyny aıalaıyq! Ol siz ben bizdiń qolymyzdan keledi!