Búgin Qaıyrymdylyq kúnine oraı "Naýryz qupıasy" qoıylymynyń premerasy ótti.
Jas kórermenderdiń arasynda kóp balaly jáne az qamtylǵan otbasylardan shyqqan balalar, sondaı-aq erekshe qajettilikteri bar búldirshinder boldy. Bir saǵattaı ýaqyt ishinde kishkentaı qonaqtarǵa Naýryzdyń ejelgi tarıhy, merekege baılanysty salt-dástúrler men ulttyq taǵamdar – Naýryz kóje týraly aıtyldy.
Sahnada Qydyr ata, Kún men Tún sıaqty keıipkerler, sondaı-aq shyǵys kúntizbesi boıynsha tyshqannan qabanǵa deıingi mıfologıalyq janýarlar ómirge keldi. Sújette ár janýar jyldyń mesenaty ataǵyna laıyq ekenin dáleldeýge tyrysty jáne ózine tán erekshe qabiletterin kórsetti. Kún men Tún tóreshi rólin atqaryp, qatysýshylardy aqyldylyǵymen, tapqyrlyǵymen jáne eptiligimen baǵalady. Biraq eń mańyzdy sheshimdi, árıne, Qydyr ata qabyldady.
Qýyrshaq teatrynyń dástúri boıynsha spektáklge ınteraktıvti elementter engizildi. Osynyń arqasynda kórermender belgili bir kezeńde qoıylymǵa qatysýshylarǵa aınalady.
— Bul spektákl – qýyrshaq teatrynyń 90 jyldyǵyna arnalǵan alǵashqy premeramyz. Onda qýyrshaq óneri men qazaq halqynyń baı fólklory úılesimdi toǵysady, — dedi Memlekettik qýyrshaq teatrynyń dırektory Almat Amangeldi. — Biregeı keıipkerler, túrli-tústi kostúmder men dınamıkalyq sújet "Naýryz qupıasyn" balalar úshin de, eresekter úshin de qyzyqty etedi. Sonymen qatar, bul – teatrymyzdyń talantty akteri Shohan Qulnazarovtyń debúttik rejıserlik jumysy. Biz onyń shyǵarmashylyq izdenisterin qoldaýǵa sheshim qabyldadyq, óıtkeni ár rólinde ol ónerge degen adaldyǵyn kórsetedi.
Spektákldi teatrdyń barlyq qoıylymdary sıaqty eki tilde – orys jáne qazaq tilderinde tamashalaýǵa bolady.
Ázirlegen: Aıajan SERİKQYZY