Sýǵa júzýden ulttyq qurama ókilderi Afınada ótken halyqaralyq týrnırde segiz medal jeńip aldy. Dúbirli dodaǵa elimizden barlyǵy 18 sportshy men 5 bapker bardy.
Týrnırde top jarǵandar 11 shilde-3 tamyz aralyǵynda Sıngapýrde ótetin sý sporty túrlerinen álem chempıonatyna qatysady. El quramasy atynan synǵa túsken Ádilbek Mýsın «Acropolis swim open 2025» halyqaralyq týrnırinde 100 m qashyqtyqta batterfláı ádisimen júzýde altyn medaldy jeńip alsa, 50 m qashyqtyqta osy ádiste júldeli ekinshi oryndy ıelendi.
Sonymen qatar Aıbat Myrzamuratov 100 m qashyqtyqta bras ádisimen júzýde ekinshi, 50 m qashyqtyqta úshinshi orynnan kórinip, el qorjynyna 1 kúmis, 1 qola medal saldy.
Aıta keterligi, Aıbat Myrzamuratov halyqaralyq deńgeıdegi sport sheberi normatıvin oryndap, sý sporty túrlerinen álem chempıonatyna qatysý múmkindigin jeńip aldy.
Áıelder arasynda 100, 200 m qashyqtyqta batter-fláı ádisimen júzýde Ksenıa Ignatova top jaryp, el abyroıyn asqaqtatty.
Áıelder arasyndaǵy bras ádisimen júzýde de otandasymyz Adelaıda Pchelınseva 50 m qashyqtyqta kúmis júldeger atandy. Sol sıaqty baterfláı ádisimen júzýde 100 m qashyqtyqta jerlesimiz Maksım Skazobsovtyń baǵy janyp, qolaǵa qol jetkizdi.
Sý sporty túrlerinen ulttyq qurama bapkeri Ilá Gýsakovtyń aıtýynsha, týrnır júzýshilerdiń aldaǵy baıraqty básekelerge daıyndyq deńgeıin kórsetip, olardyń baǵyt-baǵdaryn belgiledi. «Sportshylardyń jetistikteri az emes, alaıda joǵary deńgeıge shyǵý jolynda bizge áli de kóp jumys isteý kerek. Barlyq bapker men sportshyǵa jankeshti eńbegi, komandalyq rýhy, jeńiske degen jigeri úshin alǵys bildiremin», dedi ol.