Shaharymyzda sáýletshi jáne qoǵam qaıratkeri Shota Ydyrysuly Ýálıhanovtyń 90 jyldyǵyna arnalǵan «Sáýletshi joly – ult qundylyǵy» atty konferensıa ótti. İs-sharany memlekettik rámizderdiń 30 jyldyǵyna oraı Eýrazıa mádenıet qory uıymdastyrdy.
Almatynyń bas alańynda ornatylǵan Táýelsizdik monýmenti men Qazaqstan Respýblıkasy Eltańbasynyń avtory Shota Ýálıhanovtyń mereıtoıyna arnalǵan jıynǵa Qazaqstannyń Eńbek Eri Oljas Súleımenov, QR tuńǵysh ǵaryshkeri Toqtar Áýbákirov, ál-Farabı atyndaǵy QazUÝ-niń rektory Janseıit Túımebaev jáne zıaly qaýym ókilderi men Sh.Ýálıhanovtyń týystary qatysty.
Jıyn Erulan Qanapıanovtyń Shota Ydyrysulyna arnaǵan óleńin oqýymen bastalyp, ary qaraı qazaq tarıhynda altyn árippen jazylǵan sáýletshi týraly derekti fılmdi tamashalaýmen jalǵasty. Fılmde qazaq sáýletshisiniń ómirinen mol maǵlumat berilip, onyń muraǵattaǵy suhbaty men beınejazbalarynan birshama úzindiler kórsetildi.
Derekti fılm kórsetiliminen keıin Shota Ýálıhanov týraly estelikter aıtylyp, jalpy tulǵalyq qasıetteri jaıly áńgime órbidi.
- Shota Ýálıhanov óte ónegeli ómir súrdi. Onymen dıdarlasyp, sóılesken adam kóziniń qarashyǵy úlkeıip rýhanı baıyp qalatyn. Shotanyń oı órisi ózgeden erek edi. Sondyqtan ol sekildi adamdarmen pikir almasyp, áńgimeleskimiz keletin. Búgingi kúni sáýletshi baýyrymnyń óz qolymen jasaǵan eskertkishteri bizge mura bolyp qaldy. Al buryn sol eskerkishterdi jasaý barysynda biz maket bolyp pozaǵa turatynbyz. Onyń eńbekteri jas urpaqqa úlken tálim-tárbıe beredi, al eskerkishteri el esinde kómeskilenip bara jatqan tarıhı tulǵalardy eshqashan umyttyrmaıdy. Sondyqtan Shota syndy qaıratkerlerimizdi birinshi kezekte dáripteýimiz kerek, – dedi Qazaqstannyń halyq aqyny, QR Eńbek Eri Oljas Súleımenov.
Qazaqstan Respýblıkasynyń tuńǵysh ǵaryshkeri, Halyq Qaharmany Toqtar Áýbákirov te Shota Ýálıhanov týraly jyly estelikterin aıtty.
- Ol menen 13-aq jas úlken bolsa da, meni «ulym» deıtin. Osy sózine renjisem, «qazaqta «on úshte otaý ıesi» degen sóz bar» dep aqtalyp alatyn. Shota Ydyrysuly óte erekshe adam. Onymen sóıleskennen rahattanyp qalatynmyn. Ómirimniń jartysy Reseıde ótken maǵan ol elimizdiń tarıhyn baıyppen, uqyptap túsindiretin. Qandaı da bir jańa joba jasasa, birinshi bolyp meni shaqyryp, halyq kózimen qarap baǵa bershi dep ótinetin. Nebir jetistikterge jetse de, eshqashan tákapparlyǵyn kórmedik. Ol kisi men úshin ákeniń ornyna áke, aǵanyń orynyna aǵa boldy, aqyl aıtatyn ustaz boldy, – dep eske aldy ol.
Konferensıa barysynda «Shot-Aman Ýálıhan» atty jeti tomdyq kitaptyń tusaýkeseri ótti. Bul kitaptar jınaǵynda Shota Ýálıhanovtyń shyǵarmashylyq eńbekteri men onyń sáýletshi retindegi jumystarynyń jasalýy, mán-maǵynasy týraly derekter jınalǵan.
- «Jaqsynyń aty ólmeıdi, ǵalymnyń haty ólmeıdi» demekshi, Shota aǵamyzdyń ómir boıy jazyp-syzǵan qoljazbalary, jaryqqa shyqpaǵan jobalary men eńbekteri shashylyp ketpeı turǵanda, mynandaı jeti tomdyqqa jınaqtaý – bolashaq urpaqqa arnalǵan úlken is, – dedi L.N.Gýmılev atyndaǵy Eýrazıa ulttyq ýnıversıtetiniń profesory Shákir Ybyraev.
Jıyn sońynda ál-Farabı atyndaǵy QazUÝ rektory Janseıit Túımebaev Shota Ýálıhanovtyń zaıyby Zınaıda Kárimqyzyna kamzol kıgizip, altyn medal tabystady.