Eńbekmıni sheteldik jumys kúshin tartýǵa arnalǵan kvotany 16%-ǵa qysqartty.
2022 jylǵy 1 sáýirdegi málimetke sáıkes, jergilikti atqarýshy organdardyń ruqsaty boıynsha Qazaqstan aýmaǵynda 16 278 sheteldik azamat eńbek etedi, dep habarlaıdy Almaty-akshamy.kz mınıstrliktiń baspasóz qyzmetine silteme jasap.
Sheteldik jumys kúshin (budan ári – SHJK) tartýǵa ruqsattardyń arasynda mynadaı sanattar bar: basshylar men olardyń orynbasarlary úshin 639 ruqsat (birinshi sanat), qurylymdyq bólimshelerdiń basshylary úshin 3 150 ruqsat (ekinshi sanat). Tartylǵan SHJK negizgi bóligi úshinshi (mamandar) jáne tórtinshi (bilikti jumysshylar) sanattarǵa jatady – tıisinshe olar 8 115 jáne 825 adam. Sondaı-aq maýsymdyq jumystarǵa 1 197 adam, al korporatıvtik aýystyrý aıasynda 2 352 adam tartyldy.
Qazirgi ýaqytta Qazaqstanda SHJK paıdalanatyn 1 683 jumys berýshi bar. Olarda 429 myńnan astam Qazaqstan azamattary jumys isteıdi, bul qyzmetkerlerdiń jalpy sanynyń 96%-yn quraıdy.
Eńbek mıgranttary keletin negizgi elder: Qytaı – 3 685 adam, Túrkıa – 1 977 adam, Úndistan – 1 268 adam, Ózbekstan – 1 195 adam, Serbıa – 1 109 adam.
İshki eńbek naryǵyn qorǵaý maqsatynda QR Eńbek jáne halyqty áleýmettik qorǵaý mınıstrligi (budan ári – Eńbekmıni) jyl saıyn respýblıkaǵa sheteldik mamandardy tartýǵa kvota belgileıtinin jáne bóletinin esterińizge sala keteıik.
Osy jylǵy qańtarda iri otandyq bıznes ókilderimen kezdesý qorytyndysy boıynsha Memleket basshysynyń bergen tapsyrmasyn oryndaý úshin Eńbekmıni sheteldik jumys kúshin tartýǵa arnalǵan kvotany buryn josparlanǵan 28 352 birlikten 23 560 birlikke deıin, ıaǵnı 4 792 adamǵa (16%) qysqartty.