Qaraǵandyda Qazaqstan Táýelsizdiginiń 30 jyldyǵyna arnalǵan festıvál qorytyndylandy
Ulttyq mádenıet pen qolónerdi saqtaýǵa baǵyttalǵan is-shara jazda bastalǵan. Oǵan barlyǵy 125 qolónershi men túrli shyǵarmashylyq ujym qatysty, dep habarlaıdy Almaty-akshamy.kz.
Qatysýshylar qatarynda Azamat Baqıa da bar. Sheber festıválge «kerneı» úrmeli aspabyn ákelgen. Ol joryqta jaýyngerlerdiń jigerin qaıraý úshin qoldanylǵan kórinedi.
«Alpamys batyr jyrynda «Kerneı syrnaı tartqyzyp, bedelin jurtqa artqyzyp» degen joldar kezdesedi. Bul aspap – qazaqtyń tól aspaby. Keıinnen joǵalyp ketken. Qazirgi tańda biz sony jańǵyrtyp, jasap júrmiz. Kerneı – osyndaı is-sharada, saltanatty jıyndarda taptyrmas aspap», - deıdi ónerpaz Azamat Balqıa.
Festıválde Gúlbarshyn Matnıazova da óz jumystaryn kópshilik nazaryna usyndy. 15 jyl boıy kıizden kıim jasaıtyn elge tanymal qolóner sheberi, ónimderin shetelge shyǵara bastaǵan.
«Jaqynda tapsyrys boıynsha Djemılı atty AQSH-tyq ártiske kóılek tiktim. Qazir Dımash Qudaıbergenniń ánderin oryndaıtyn Fabıo esimdi ıtalıalyq ónerpazǵa ulttyq kıim daıyndaý ústindemin. Sońǵy kezderi sheteldikter qazaqtyń kıizinen jasalatyn kıimge tapsyrys berýde», - qolóner sheberi Gúlbarshyn Matnıazova.
Festıvál uıymdastyrýshylary sheberlerdi dástúrli túrde ár 2 jyl saıyn jınaýdy josparlap otyrǵanyn atap ótken jón.