Úkim zańdy kúshine engen joq
Jetisý oblysynyń Sarqan aýdanyndaǵy qoqys úıindisinen óli tabylǵan bes jasar qyzdyń isine qatysty sot úkimi shyqty. Bul týraly Jetisý oblysynyń Qylmystyq ister jónindegi mamandandyrylǵan aýdanaralyq sotynyń baspasóz qyzmeti málim etti, dep habarlaıdy Almaty-akshamy.kz.
Sottyń málimetinshe, marqum qyzdy sheshesi men onyń týysqan aǵasy qalanyń syrtynda ornalasqan kirpish zaýytynyń janyndaǵy polıgonǵa alyp kelip, aldyn ala sóz baılasqandaı, balany óltirip, sodan keıin deneni jasyrǵan.
«Sottalýshylar kinásin tolyq moıyndaǵandyqtan jáne sottalýshynyń tárbıesinde jas bala bolǵandyqtan, prokýror olardy QR Qylmystyq kodekstiń 99-babynyń 3-bóligi boıynsha kináli dep tanýdy jáne osy baptyń negizinde 15 jyl merzimge bas bostandyǵynan aıyrý jazasyn taǵaıyndaýdy surady", - delingen sottyń habarlamasynda.
Sot otyrysynyń qorytyndysy boıynsha sýdıa ekeýin de kináli dep tanyp, olarǵa 15 jylǵa bas bostandyǵynan aıyrý jazasyn taǵaıyndady.
Úkim zańdy kúshine engen joq.
Aıta keteıik, 17 mamyrda Sarqanda qala mańyndaǵy qoqys polıgonynan 4-5 jas aralyǵyndaǵy qyzdyń denesi tabyldy. Birneshe adam kisi óltirý kúdigimen qamaýǵa alyndy. Anasynyń aıtýynsha, qyz serebraldy sal aýrýymen aýyrǵan, sondaı-aq týa bitken aqyl-oı kemistigi de bar.