Páterlerdiń qymbattaýyna aıqyn sebepter joq.
Birqatar qazaqstandyq sarapshylar aldaǵy ýaqytta úı baǵasynyń tómendeıtinine senimdi, dep habarlaıdy Almaty-akshamy.kz Turkystan.kz silteme jasap.
Sońǵy jyldary turǵyn úı naryǵyn buryn-sońdy bolmaǵan qymbatshylyq jaılady. Tek byltyr baǵa birden 10-12 paıyzǵa ósti. Degenmen, birqatar sarapshylar aldaǵy ýaqytta úı baǵasynyń tómendeıtinine senimdi.
«Elde qańtar oqıǵasynan keıingi jaǵdaı birtindep túzelip keledi. Adamdar qalypty ómirge qaıta oraldy. Inflásıaǵa baılanysty páter baǵasy jyl saıyn orta eseppen 10%-ǵa qymbattaýda. Satýshylar baǵany shynymen kóterdi. Árbir satýshy baspanany meıilinshe qymbatqa ótkizgisi keledi. Al satyp alýshy, kerisinshe, arzanǵa izdeıdi. Bul - zańdy qubylys. Qazir zeınetaqy jınaǵynyń jetkilikti shegi artty. Sondyqtan baspananyń baǵasy arzandaıdy», – deıdi Qazaqstannyń Birikken rıeltorlar qaýymdastyǵynyń prezıdenti Larısa Stepanenko.
Spıkerdiń sózinshe, qazir páterlerdiń qymbattaýyna aıqyn sebepter joq. Óıtkeni suranys naryqtaǵy usynystan áldeqaıda tómen. Jazǵa qaraı, ádettegideı, elde halyqtyń belsendi kóshi-qony bastalady.
«Jaz ýaqytynda kóp baspana satylymǵa shyǵarylady. Alaıda, bul baǵany negizsiz ósirýge ákelmeýi kerek. Sebebi, halyqtyń jalaqysy ósken joq. Memleket turǵyn úı satyp alý úshin banktik baǵdarlamalardy áli shyǵarǵan joq. Úı ıeleri satylymǵa qoıǵan baspanasynyń baǵasyn túsiredi. Bizde páter satýshylar kóp te, satyp alýshylardyń sany áldeqaıda az. Sondyqtan baspana arzandaýy kerek. Úıin satqysy keletin adamdar onyń baǵasyn túsirýge májbúr bolady», – dep qorytyndylady sózin Larısa Stepanenko.