«Azamattarǵa arnalǵan úkimet» memlekettik korporasıasy KEAQ Almaty qalasy boıynsha fılıaly Almaly aýdandyq front-ofısinde qoǵamdyq qabyldaý sharalary ótkizildi. Shara qala turǵyndarynyń memlekettik qyzmetterdi alýdaǵy túıtkildi suraqtaryna jaýap berý, quqyq buzýshylyqtarǵa tózbeý qaǵıdatyn qalyptastyrý, sybaılas jemqorlyqtyń aldyn alý maqsatynda uıymdastyryldy, dep habarlaıdy Almaty-akshamy.kz.
«Biz mundaı qoǵamdyq qabyldaýlardy buryn da ótkizip turatynbyz. Pandemıa saldarynan biraz ýaqyt toqtap qaldy. Endi qaıta qolǵa alyp, ár aýdandaǵy HQO bólimderinde qyzmet alýshylarmen betpe-bet kezdesip, máseleleriniń shuǵyl sheshilýine yqpal etpekpiz. Shara turǵyndarǵa qanshalyqty paıdaly bolsa, olardyń syn-eskertpeleri arqyly biz de qyzmet usyný úderisterin jetildire beretin bolamyz», – deıdi «Azamattarǵa arnalǵan úkimet» memlekettik korporasıasy KE AQ Almaty qalasy boıynsha fılıalynyń dırektory Ermek Bekjúnisov.
Ótken aptada Medeý aýdanynyń qyzmet alýshylary, al bul joly Almaly aýdanynyń turǵyndary memlekettik qyzmet alýǵa qatysty suraqtaryna jaýap aldy. Aýdan turǵyny Aıgúl Sábıtqyzy tolyq emes otbasy retinde úı kezegine turý jolyn surasa, Jadyra Amanova ońaltý boıynsha birjolǵy tólemder týraly, Sergeı Aleksandrov turǵylyqty mekenjaıynyń ózgeristerine qatysty, Elena Andreeva memlekettik aktini elektrondyq formatta alý sıaqty suraqtarmen kelse, Raısa Sergeeva páterinde turǵan burynǵy turǵyndaryn tirkeýden shyǵarý jolyn surady.
İs-shara barysynda 50-ge jýyq qyzmet alýshynyń suraqtary tyńdalyp, keıbir máselelerdi departament óz quziretiniń sheginde baqylaýǵa aldy. Suraqtardyń basym kópshiligi áleýmettik salasyna, jer jáne qujattandyrý máselelerine qatysty boldy.
«Memleket basshysynyń «Halyq únine qulaq asatyn memleket» qaǵıdatyn iske asyrý jónindegi tapsyrmasyn oryndaý sheńberinde memlekettik qyzmetter kórsetý barysynda halyqtyń kóp kedergilerge tap bolmaı, sapaly qyzmet alýyna jańdaı jasaý. Sharany uıymdastyrýdaǵy maqsatymyz - memlekettik organdardyń ashyqtyǵy men aıqyndyǵyn qamtamasyz etý. Qalyptasqan syndarly dıalogta nátıjege qanaǵattanǵan jáne memlekettik organdardyń jumysy týraly oń pikirlerin qaldyrǵan azamattardyń birqatar qajettilikteri sheshildi», – deıdi Qazaqstan Respýblıkasynyń memlekettik qyzmet isteri agenttigi Almaty qalasy departamentiniń ókili Maqsat Jańbyrshıev.
Bul shara barlyq sanıtarlyq normalardy, sonymen qatar áleýmettik qashyqtyqty saqtaı otyryp ótkizildi.
Mundaı qoǵamdyq qabyldaýlar qalanyń árbir aýdanyndaǵy front-ofısterde (HQO) apta saıyn ótip turady deıdi uıymdastyrýshylar.