«Almaty aqshamý» jolaýshylardyń senimdi serigine aınaldy
Poıyz bastyǵy Ospanov Bekzat bul bastama jaıly óz pikirin bylaı jetkizdi:
«Osy jyldan bastap bizdiń vagondarǵa gazetter jetkizile bastady. Bul bastama jolaýshylar arasynda erekshe qoldaý tapty. Sebebi, jolda gazet oqýdy unatatyndar óte kóp. Keıbir kezderi jolaýshylar qosymsha gazetter suratyp jatady. Gazet oqý adamnyń rýhanı damýyna áser etedi dep oılaımyn. Ásirese, qaladaǵy jańalyqtardan habardar bolyp otyrý úshin bul óte paıdaly. Gazettegi aqparattardyń shynaıylyǵyna senimim mol, sondyqtan ony oqıtyn jolaýshylar sanynyń ósýi bizdi qýantady».
Áıelder vagonynyń jolserigi Hodjabaı Sanıanyń aıtýynsha, egde jastaǵy jolaýshylar gazetterge erekshe qyzyǵýshylyq tanytady:
«Men osy salada segiz jyldan beri jumys istep kelemin. Sońǵy eki jylda áıelder vagonynda qyzmet etýdemin. Bul vagondarda kóbinese egde jastaǵy analarymyz saparǵa shyǵady. Olardyń gazet oqyp, belgili bir taqyryptarda ózara talqylaý júrgizgenin jıi baıqaımyn. Jolda ınternettiń turaqsyzdyǵy gazet oqýǵa ýaqyt bólýge sebep bolyp otyr. Bul bastama biz úshin de, jolaýshylar úshin de paıdaly».
Jastar arasynda da gazet oqýǵa degen qyzyǵýshylyq joǵary. Stýdent Toppysh Zarına oziniń osy bastamaǵa oń kózqarasyn bildirdi:
«Stýdent bolǵandyqtan poıyzben jıi júremin. Men jańalyqtardy áleýmettik jeliden de, gazetten de baqylap otyramyn. «Almaty aqshamý» gazeti oqý oryndarynan bastap, poıyzdarǵa deıin jıi kezdesedi. Ásirese, mádenı jáne sporttyq sharalar týraly jańalyqtardy oqyǵandy unatamyn. Gazet turǵyndarga óz qalasy jaıly mańyzdy aqparattardy der kezinde alýǵa múmkindik beretin qural. Poıyzda gazetterdiń bolýy jolaýshylarǵa oı túıip, ýaqytty paıdaly ótkizýge tamasha jaǵdaı jasaıdy».
Gazet okýga degen súıispenshilik úlken jastaǵy jolaýshylar arasynda erekshe baıqalady. Zeınetker Azıma Jamasheva pikiri de muny dáleldeı túsedi:
«Men poıyzben jıi qatynaımyn, kóbinese uzaq joldarda gazet oqyǵandy jaqsy kóremin. Buryn da «Almaty aqshamy» gazetin únemi alatynmyn, endi ony vagondarda taratyp jatqanyna erekshe qýanamyn. Gazet arqyly qaladaǵy mańyzdy oqıǵalardan habardar bolyp otyramyn. Jolda gazet oqý ýaqyt ótkizý ǵana emes, sondaı-aq paıdaly aqparat alýdyń tamasha joly dep bilemin. Ásirese, jastardyń gazetke qyzyǵýshylyq tanytyp jatqany qýantarlyq jaıt».
Jolaýshylar arasynda gazettiń mańyzdylyǵyn erekshe atap ótetinder kop. Olar úshin gazet tek jańalyq kózi gana emes, sondaı-aq, bilim men rýhanı baılyqqa aparatyn jol. Bul bastama Almatynyń turǵyndary men qonaqtaryna qalanyń tynys-tirshiliginen habardar bolýǵa múmkindik berip, aqparattyq qoljetimdilikti arttyrýda. «Jolaýshylar tasymaly» AQ-ǵa seriktestik úshin alǵysymyzdy bildiremiz. Birlese otyryp, biz jolaýshylarǵa yńǵaıly jaǵdaı jasap, olardyń saparlaryn qyzyqty ári paıdaly etýge úles qosyp jatyrmyz.