Reseıde qazaqstandyq músinshiniń jeke kórmesi ashyldy.
Tarıh, atameken, dúnıetanym. Tamerlan Tles óz týyndylarynda osy taqyryptardy qozǵaıdy. Sheber óz eńbekterinde qazaq halqynyń dúnıetanymyn ulttyq tarıh arqyly kórsetýge tyrysady. Sondaı jumystardyń biri – «Ómir» pannosy. Onymen jumys isteý barysynda sýretshi óte sırek matarıaldardy izdep, úsh qurlyqty sharlaǵan. Jańa materıaldarmen jumys isteýdi has sheberlerden meńgerip te qaıtqan, dep habarlaıdy Almaty-akshamy.kz Qazaqtv.com-ǵa silteme jasap.
Tamerlan Tles ejelgi qolóner ádisterin ózinshe jetildirip, zamanaýı tehnologıalarmen sheber úılestire alatynymen erekshelenedi. Ekspozısıanyń ózi óner tilimen jetkizilgen hıkaıa syndy. Qazaqstandyq músinshiniń Sankt-Peterbýrgtegi kórmesi qazannyń 9-yna deıin jalǵasady.
«Jergilikti turǵyndardyń Qazaqstan týraly bilimi kóp emes. Qazaqstan – tarıhy ejelden tamyr tartqan, mádenıeti baı, fılosofıasy tereń keremet el. Tamerlan ony óz shyǵarmashylyǵymen jaqsy jetkize bilgen. Shyǵarmashylyǵy árqıly ári qoldanatyn materıaldary da san túrli. Tasty da, mamont múıizin de, metal men baǵaly tastardy sheber úılestire biledi. Osy jerde qazaq halqynyń dástúrli ómirinen syr shertetin eńbekterdi tamashalaýǵa bolady. Tańqaldyrarlyq», - deıdi Memlekettik shyǵys mýzeıiniń ǵylymı qyzmetkeri Marıa Fılatova.
«Kelgen qonaqtar qazaq mádenıeti týraly habar alyp, suraq qoıyp jatyr. Salt-dástúrlerimiz, kókpar oıyny týraly bilgisi kelgender kóp boldy. Qazaq halqynyń mádenıetin tanystyrý – men úshin qurmet. Óner arqyly halyqtardy jaqyndastyrý, tól mádenıetimizdi keńge tanystyrý úshin eńbek etip kelemiz», - deıdi músinshi Tamerlan Tles.
.