Maýsym aıynda azyq-túlik taýarlarynyń álemdik baǵasy azdap tómendedi.
FAO et baǵasynyń ındeksi maýsym aıynda kezekti ret rekordtyq deńgeıge – 124,7 pýnktke jetti. Bul mamyr aıyndaǵy kórsetkishten 1,7%-ǵa jáne 2021 jylǵy maýsym deńgeıinen 12,7%-ǵa joǵary. Bul týraly Birikken Ulttar Uıymynyń Azyq-túlik jáne aýylsharýashylyq uıymynyń (FAO) sholýynda aıtylǵan, dep habarlaıdy Almaty-akshamy.kz.
«Barlyq et túrleriniń álemdik baǵasy ósti, biraq basqalarǵa qaraǵanda rekordtyq deńgeıge deıin qus eti qymbattady, óıtkeni Ýkraınadaǵy soǵys pen Soltústik jarty sharda qus tumaýynyń órshýine baılanysty álemdik naryqtaǵy usynys áli de shekteýli. Qytaı Brazılıadan et ımporttaýǵa salǵan tyıymyn alyp tastaǵan soń sıyr etiniń baǵasy kóterildi», - delingen FAO sholýynda.
Sholýdaǵy derek boıynsha, shoshqa eti baǵasynyń shamaly ósýi birqatar jetekshi ımporttaýshylardan satyp alýdyń artýyna baılanysty bolǵan. Degenmen Qytaı áli de shoshqa etin shekteýli mólsherde satyp alady. Qoı etiniń álemdik baǵasynyń ósýine Soltústik Azıa elderiniń suranysynyń azdyǵyna qaramastan, Jańa Zelandıadaǵy eksporttyq qorlardyń azaıýy sebep bolǵan.
FAO derekteri boıynsha maýsym aıynda azyq-túlik taýarlarynyń álemdik baǵasy azdap tómendedi, mundaı trend qatarynan úshinshi aı baıqalady. Bul rette azyq-túlik taýarlaryna baǵa ındeksiniń máni 2021 jylǵy maýsymdaǵy kórsetkishten 23,1%-ǵa joǵary bolyp qalady. Ótken aıda ósimdik maılaryna, dándi daqyldar men qantqa álemdik baǵanyń tómendeýi baıqaldy.