ınteraktıvti ekspozısıasynyń tusaýkeser ótti.
QR Memlekettik ortalyq mýzeıinde Ulystyń uly kúni – Naýryz meıramyn toılaýdaǵy jańa tujyrymdamaǵa sáıes, «Sandyq álemdegi qylqalam qudireti» ınteraktıvti ekspozısıasynyń tusaýkeseri ótti.
Ekspozısıanyń ashylý saltanatyna qylqalam sheberleri, Qazaqstan sýretshiler odaǵynyń múshesi, «Qazaqstannyń eńbek sińirgen qaıratkeri», «Parasat» ordeniniń ıegeri Alpysbaı Qazyǵulov, Reseı etnografıalyq mýzeıiniń Kavkaz, Ortalyq Azıa jáne Qazaqstan etnografıasy bóliminiń jetekshisi L.F. Popova, O.Tańsyqbaev atyndaǵy Almaty sándik-qoldanbaly óner kolejiniń oqytýshylary men stýdentteri, mýzeı qonaqtary qatysty.
Eki ǵasyrlyq tarıhy bar Ortalyq mýzeıdiń qorynda 273 myńnan astam mýzeılik qundylyq saqtalǵan. Onyń ishinde beıneleý óneri koleksıasynda on myńǵa jýyq kórkem týyndy jınaqtalsa, 4723 saqtam birligin keskindeme jáne grafıkalyq jumystar quraıdy. Osy koleksıa negizinde alǵash ret kelýshiler nazaryna usynylyp otyrǵan tyń joba – ınteraktıvti ekspozısıada Ortalyq mýzeıdiń beıneleý óneri koleksıasynda shyǵarmalary saqtalǵan 52 qazaqstandyq sýretshiniń ishindegi 10 qylqalam sheberiniń beıneleý óneriniń keskindeme jáne grafıka baǵytynda oryndalǵan etnografıalyq taqyryptaǵy, sondaı-aq, peızaj, portret janryndaǵy maıly boıaý men akvarel tehnıkasynda oryndalǵan 100 jumysynyń sandyq formattaǵy kórsetilimi tanystyryldy.
Interaktıvti ekspozısıanyń maqsaty – mýzeı qorynda saqtalǵan beıneleý óneri týyndylaryn, qazaqstandyq sýretshilerdiń shyǵarmashylyǵyn nasıhattaý, olardyń týyndylaryna qoljetimdilikti qamtamasyz etý.