İshki ister mınıstriniń birinshi orynbasary Marat Qojaev polısıa qyzmetkerleriniń jýrnalıs Sandýǵash Dúısenovany sheshindirip tintýine qatysty pikir bildirdi, dep habarlaıdy Almaty-akshamy.kz.
«Qylmystyq is áli tergelip jatyr. Bizdiń qyzmetkerlerdiń is-áreketteriniń zańdylyǵyn prokýrorlar, odan keıin sot tekseredi. Sol jerde kemshilik anyqtalyp, qyzmetkerlerimiz mindetterin durys atqarmasa, sot úkimi shyqqannan keıin keshirim suraýǵa daıynbyz», - dedi Marat Qojaev Úkimet otyrysynan keıin BAQ ókilderiniń saýalyna oraı.
Eske sala keteıik, 11 tamyzda jetisýlyq jýrnalıs, azamattyq belsendi Sandýǵash Dúısenova ustalǵan edi.
Oǵan QR Qylmystyq kodekstiń 147-baby 5-bóligi boıynsha aıyp taǵylǵan. Bul bapta adamnyń jeke ómiri týraly aqparatty taratqandarǵa jaza qarastyrylǵan.
Keıin bosap shyqqan jýrnalıs ózin polıseıler bólimshede sheshindirip, vıdeoǵa túsirgenin jetkizip, áleýmettik jeli arqyly hat jazǵan edi.
Osyǵan oraı Jetisý oblystyq Polısıa departamenti málimdeme jasap, nelikten vıdeoǵa túsirgenin túsindirdi.